Sawrkar laipuia Ministry of Petroleum & Natural Gas (MoPNG) in chhung kaw khawsak harsaa hmeichhe puitling pakhat tal awmnate tan a thlawna gas connection a tihsakna, Pra dhan Mantri Ujjwala Yojana (PMUY) hnuaiah Mizoramah gas connection 38,305 a awm tawh a. Mamit district-ah PMUY gas connection 7,517 awmin a tam ber.
PMUY hi May ni 1, 2016 ah khan Prime Minister Narendra Modi chuan Ballia, Uttar Pradesh-ah a tlangzarh a. He scheme hi ram chhung thingtlanga cheng in tinte hnena eirawng bawlna gas, LPG pekna tur atana ruahman a ni a. Thla hmasa ni 23 thleng khan India ram pumah PMUY scheme kal tlang hian chhungkaw khawsak harsa gas connection la nei lo zinga hmeichhe puitling pakhat tal awmnate hnenah gas connection 10,56,85,306 pek a ni tawh a. Heng zinga 10,32,42,781 hi PMUY 1.0 hnuaia pek niin, PMUY 2.0 hnuaia pek connection 24,42,525 a awm bawk.
PMUY Report hnuhnung berin a tarlan danin, kumin September ni 23 thleng khan Mizorama district tinah PMUY gas connection pek a ni tawh a. Heng zinga 35,934 hi PMUY 1.0 hnuaia pek niin, PMUY 2.0 hnuaiah connection 2,371 pek a ni bawk a, a vaiin Mizorama PMUY gas connection awm mek hi 38,305 a tling.
Report hnuhnung berin a tarlan dan chuan, Mamit District chu PMUY connection tam berna niin connection 7,517 a awm mek a, Aizawl District-in dawtin connection 6,913 a awm a, Kolasib district-ah 4,891, Lunglei district-ah 4,575, Lawngtlai disrtict-ah 4,159, Champhai district-ah 2,252, Hnahthial district-ah 2,235, Serchhip district-ah 2,132, Saitual district-ah 1,390, Khawzawl disrtict-ah 1,158 leh Siaha district-ah 1083 awmin, Siaha district hi PMUY Gas Connection tlem berna a ni.
