Aizawl City PYD Coordination Committee hmalaknain 2.10.2026 (Zirtawpni) ah Chite lui dung then fai hnatlang neih a ni a. Hnatlangte hian Bethlehem Vengthlang kai, Chite atanga bul tanin lui dung an suartluan a ni.
He hnatlang hi AMC Corporator Dr. Lalmalsawma Nghaka chuan hmanpuiin thu a sawi a, “Tun laiah thalaiten social media kan hmang nasa hle a. Vawiinah Penticostal kohhran thalaite a taka hna thawk tura in feh chhuak hi a lawmawm hle. Mihring nun a changkan zel laiin kan lui dung leh kan hmun pawimawh te kan la tibal hle. Chite lui pawh hi hnawmhnawk a awm leh thin a, then fai a ngai tak zet zet a, City PYD ten hetianga thalaite infuih chunga hnatlang pawimawh tak in nei hi a lawmawm hle a ni,” a ti.
Dr. Lalmalsawma Nghaka chuan, “Kan environment humhalh hi Kristian kan nih anga kan tih tur a nih piah lamah citizen tha kan nih anga kan tih tur a ni tih hriat zel hi mitin mawhphurhna a ni a. Kan lui dung te ti bawlhhlawh lo tura mitin inzirtir hi kan mamawh a, kan bawlhhlawhte paih mai mai loin, a paihna tura dik taka paih hi mitin mawhphurhna a ni a, inzirtir zel hi kan tih tur a ni,” a ti bawk.
“Mizoram hi chenna tlaka siam hi a chhunga chengte mawhphurhna a ni a, Aizawl khawpuia chengte pawhin kan lui dungte fai taka siam hi kan tih tur a ni,” tiin a sawi.
Lui dung then fai hnatlang hi Bethlehem Vengthlang kai, Chite atanga bul tan a ni a. Khawpui chhung PYD bial hrang hrangte lui chhak lamah kal chho zelin, lui dung then fai hnatlang hi nilengin an nei a ni.
Evan F. Malsawmdangliana, Chairman, Aizawl City PYD Coordination Committee-in hnatlang hi a kaihruai a, Evan Dr. Vanlalpeka, General Secretary, General PYD chuan hunserh a hmang a ni.
PYD te hian Social Work Day apiangin vantlang tan hna tangkai an thawk thin a. Hospital tihfai te, vantlang kawng dung tihfai hna te an lo thawk tawh thin a. Kuminah Chite lui dung then fai hna thawh a ni a, Social Work Day hi kum tin nei thinin, kumin hi vawi 27 an neihna a ni.
