Asian Games 2026 a India tana gold medal latu hockey player pahnih, Lalremsiami Hmar leh Lalthantluangi chu Thawhtanniah hian Chief Minister hoin vantlang huapa hmuah an ni dawn.
Lalremsiami leh Lalthantluangi te thian dun hi Lengpui Airport-ah Deputy Speaker Lalfamkima hoin sawrkar leh sports association, Mizoram Olympic Association (MOA), United Sports Association of Mizoram (USAM) leh Hockey Mizoram aiawhten an lo hmuak hmasa ang.
Asian Games gold medal latute hi chawhnu dar 1:30 ah airport atanga chhuakin Hunthar peng atangin Chanmari-ah an kual ang a, Treasury Square atanga Republic Veng leh ITI Veng kal tlangin R. Dengthuama Hall an pan ang a, hetah hian Chief Minister Lalduhoma hoin lawmna hun hman a ni dawn a ni.
R. Dengthuama Hall-a lawmna hunah hian Minister leh MLA, sawrkar mi pawimawhte leh sports association aiawh, MOA, USAM, Thenzawl Hockey Academy, SAI Training Centre, Aizawl leh Khelo India State Centre of Excellence (KISCE) a training te, MJA leh NGO hrang hrang te, college zirlaite bakah a duh apiang tan tel theih a ni ang.
Mizo hockey player chhuanvawr pahnih hmuah dan tur hi Inrinniah khan Sports Minister Lalnghinglova Hmar hoin a office-ah sawrkar hotute leh sports association aiawhten an rel a. Hunthar atanga a lawmna hmun panna kawng dunga awmte chu an awm hmun theuhah lawmna lo lantir turin an ngen.
