Bible Society of India (BSI), Aizawl Auxiliary chuan Bible an tihchhuah chu siam danglama sumdawnna atana hmang an awm tih sawiin, phalna la mumal loa mobile application siam pawh an awm nia an hriat thu an sawi.
Committee thuchhuak tarlangin BSI, Aizawl Auxiliary chuan, "Pathian Lehkhabu Thianghlim hi Kristiante thurin innghahna, kohhranhoten kan zah leh kan serh em em lehkhabu thianghlim a ni a, sumdawnna atana mahni thua lo siam danglam emaw, phalna la fel loa tihchhuah ve emaw a rem lo," an ti.
An thuchhuahah hian 2006 leh 2015 a kohhran pawl hrang hrang hruaitute inhmukhawmin Bible Society kut chhuak Bible te chauh kohhranhote hman bik tura an ngaih thu an lo rel ho tawh chu a theih chin china ngai pawimawh turin kohhran mite an ngen thu an tarlang.
Mi mal hman tur ni loa Bible kawm siam danglam leh a bu tidanglama sumdawnna atana hmangte leh BSI remtihna la hmasa loa kawng chi hrang hrang, ziak, en theih chi leh digital Bible lo tichhuakte chu ti chhunzawm lo turin an ngen.
BSI chuan Bible hmelhmang chi hrang hrang leh a kawm rawng chi hrang hrang an tichhuak reng a, phone atanga chhiar leh ngaihthlak theih chi Mizo Bible app pawh tihchhuah thuai an tum thu an sawi a. Hei hi hman tangkai tum hram turin kohhran mite an ngen a ni.
