Central Kristian Thalai Pawl (CKTP) buatsaihin ‘Ram Pum Huap Faina Beihpui Hnatlang’ chu vawiinah khan neih a ni.
He ‘Ram Pum Huap Faina Beihpui Hnatlang’ ah hian AMC area chhung leh Aizawl pawn lamah te ruahmanna hrang hrang siam a ni a. AMC area chhungah chuan hnatlanna tur hmun 24 ruat a ni a, heng hmun ruatah te hian Bial KTP te an hnatlang a, Convener ruat te chuan an ho a. Aizawl Municipal Corporation (AMC) lamin garbage bag, kutkawr, bawlhhlawh paihna motor leh ei leh in man an tum a ni.
Aizawl pawn lamah erawh mahni bial theuhah Bial KTP te ruahmannain hnatlan a ni a, UD & PA Department lamin garbage bag, kutkawr leh ei leh in man hi an tum a. Bawlhhlawh paihna hmun leh a paihna hmanrua hi chu Bial KTP ten an ngaihtuah thung a ni.
Central KTP ruahmannaa buatsaih faina beihpui hnatlangah hian KTP member thahnem tak an hnatlang thei a. Aizawl khawpui bikah chuan KTP member 3,288 hnatlangin, thingtlang leh district khawpui dangah pawh eng emaw zat an thawk chhuak bawk a ni.
Faina hnatlang hi kumin kumin tira KTP General Conference vawi 61-na, Saituala rorel bawhzuina atana buatsaih a ni.
