Chief Minister Lalduhoma chuan ram chhungah CSR chu pung viau mahse rual taka sem thin a ni lo a ti a, CSR chu ram hmasawnna tur atana duan a nih angin hma sawnna ruhrel nei lian saah hmang ringawt loin, hmun kilkhawr tihhmasawn nana hma lak a pawimawh a ti a. Mizoram chu India leh thenawm ramte inpawhna hmun pawi mawh a nih avangin CSR hman chhuah kawngah Mizoram ngai pawimawh turin a chah a ni.
CM Lalduhoma chuan Northeast Bankers Conclave chuan sawrkar leh bank hrang hrangte inkarah thawhhona tha an neih theih nan leh mipuiten hlawkna an hmuh theih nana buatsaih a ni a ti a. Bank chu khawtlang tihhmasawn nan leh ei leh bar zawnna kawnga mipuite khai chhuaktu pawimawh tak a ni a ti.
Lalduhoma chuan Mizoramin kum 2025-26 chhungin Credit - Deposit Ratio 55.83% a nei a ti a. Kumin June thlaa quarter zawh hnuah Mizorama bank 7 te chu CD Ratio 40 hnuaiah an awm a ti a. Mizoram sawrkar chuan kum 2028-29 atangin bank hrang hrangte CD Ratio chu zaa 67 aia sang ni turin target an tuk a ti a, hei hi sawrkar laipuiin target a phut zaa 70 chu a pha lo tih sawiin, hmasawnna tur tam tak an la nei tih a sawi.
Mizoram sawrkar flagship programme ‘Bana Kaih’ chu kuthnathawktute khai chhuah nan Mizoram bank 5 nena thlun zawm a ni a ti a. Bank an thawhpuite chu kuthnathawktute puih kawngah theihtawp chhuah zel turin a chah a ni.
Mizoram CM chuan Mizoram chuan hmasawnna tur kawng tam tak a la nei tih sawiin, bank hrang hrangte chu thalai hmasawn duh te thawhpui a, hmasawn duh te loan hmanga tanpui tur leh hmun kilkhawr thlenga hmasawnna tluantling a awm theih nana thawhpuiah a sawm a ni.
