Mizote damdawi in pan nasat ber zinga mi, Christian Medical College (CMC), Vellore chu Mizoram Universal Health Care Scheme (MUHCS) hnuaiah empanel a ni ta. Vawiin October ni 12 hian Health Minister Lalrinpuii hovin Mizoram Sawrkar leh CMC Vellore hotuten thawhhona thuthlung (MoU) an ziakfel.
He inremna avang hian Mizoram atanga natna khirhkhan vanga CMC pan ngai damlote chuan pawisa chawi ngai lova inenkawlna (cashless treatment) an dawng thei tawh dawn a ni. Tun hma, MUHCS 1.0 hunlai atang tawh khan he damdawi in lian hi thawhpui tura beisei a nih thin laiin, reimbursement chauh an hman theih thu sawiin an lo hnawl fo tawh thin a. Amaherawhchu, Health Minister hmalaknain sawrkar kalphung thar leh bill pekchhuah dan fel fai te hrilhfiah a nih hnuah inremna hi ziah a ni ta a ni.
CMC hotute chuan Mizoram sawrkar hmalakna chu fakawm an tih thu sawiin, he scheme hi sawrkar hnathawk chauh ni lo, mirethei berte thleng phak a nih avangin thawhpui an chak hle tih an sawi a. Hei vang hian Draft MoU pawh darkar 48 chhung leka pawmin, an damdawi in thil tawn tawh zinga inremna an pawm ran ber a nih thu an tarlang bawk. Missionary-te bul tan a nih angin tanpui ngaite chu theihtawpa puih an inpeih reng tih sawiin, tunah phei chuan Chennai Airport atanga darkar hnih chhung leka thlen theih a nih tawh avangin kalkawng lamah pawh buaina a tlem phah sawt tih an sawi tel bawk.
Minister Lalrinpuii chuan CMC Vellore enkawlna man chu damdawi in dangte lakah a tlawm zawk tih tarlangin, hemi hmanga mipui sum sen ral tur tam tak a veng tur chu lawmawm a tih thu a sawi.
He inremna pawimawh hi Health Minister hova ziah niin, Mizoram sawrkar aiawhin Commissioner & Secretary Lalzarmawii, IAS, Under Secretary H. Lalhruaitluanga leh MSHCS Programme Manager Dr. Lalbeiseia Renthlei ten an ziak a. CMC Vellore lam atangin Director Dr. Biju George, Medical Superintendent Dr. Rajesh I leh Associate Director (Finance) Dr. Selvamani B ten hming an ziak ve thung a, hemi hunah hian CMC Chaplain Rev. Lalthanzuala pawh a tel a ni.
