Central YMA chuan vawiinah khan ambulance atana an hman lai, Mahindra Supro (MZ 01 Z 2369) chu Cachar biala Mizo mipuite mamawh phuhrukna atan Silchar Branch YMA hnenah an hlan.
Ambulance hlanna hun hi Central YMA Hall-ah hman a ni a, Central YMA President R. Lalngheta chuan a kaihruai a. Er. H. Duhkima, Treasurer, Central YMA chuan hunserh hmangin Pathian hnenah ambulance hlanna hun a hmang.
He hunah hian R. Lalngheta chuan thu sawiin, Central YMA hruaitute chuan Central YMA in ambulance dang an neih belh tak avangin Cachar bial leh a chhehvela Mizo mipuite leh damlo phurh ngaite tana tangkai taka an hman zui atan he ambulance hi Silchar Branch YMA hnena hlan a nih thu a sawi.
Silchar Branch YMA aiawh hian Branch YMA President K. Vanlalhriata chuan lawmthu a sawi a, "Central YMA in duhsak taka Silchar Branch YMA hnena ambulance an hlan chu Silchar-a YMA leh Mizo mipuite tan chuan bung thar kaina chhinchhiahtlak tak a ni a. He ambulance hi Silchar leh a chhehvela Mizo awmte mai bakah, Silchar-a Kristian Kohhran hrang hrangte leh mamawhtute tan pawh tangkai taka hman a nih ngei kan beisei,” a ti.
