Dik lo taka pension lo la, tun thlenga la pe kir lo an awm leh awm loh endik hna chu tun thla tir lam atangin Task Force chuan an thawk tan.
Mizoram sawrkarin dik tawk lo deuha family pension late tana mahni thua pek let hun a hawn chu September 30, 2026 ah khan a tawp a, hun hawn chhung hian pension pe let mi 674 an awm.
Task Force te chuan 2.10.2026 atang khan pension surrender lo an awm leh awm loh endik turin hma an la tan a. Accounts & Treasuries hotute chuan danin a phal loh anga family pension laten anmahni duh thua an pension lakte an tihtawpna tura Mizoram sawrkarin a ruahman 'Voluntary Surrender of Pension Payment Order (PPO)' chu kumin July ni 1 atanga September ni 30 chhung khan kalpui a nih thu leh hemi chhung hian mi 674 in pension lakna PPO an surrender tih an sawi a. Pension surrender 674 zinga 560 hi Treasury-a surrender an ni a, a bak 114 hi bank lama surrender an ni an ti.
Pension pek kir theih hun tiam chhunga PPO surrender te lakah hian sawrkar chuan hremna lek a tum lo a, hun tiam chhunga family pension lehkha pawimawh pe let lo te, dan loa pension la chhunzawm hmuh chhuah an awm chuan dan angin hrem an ni ang.
Accounts & Treasuries hotute chuan danin a phal loh anga pension la chhunzawm chu thuneitute hnena report na tur an ruahman thu an sawi a ni.
