Mizoram Pradesh Congress Committee (MPCC) President Lal Thanzara chuan NEET zawhna put ru avangin India ram thalai tam tak thin a rim tih sawiin, thalaite hnathawh tur, youth employment siamah BJP sawrkar a hmingchhia niin a sawi a. India rama thalai thinrim ten CJP an din a, hei hian BJP sawrkar PM Modi kaihhruai a pawt hniam em em a ni a ti.
MPCC President chuan tun hnaiah India politics a inlumlet nasa tih sawiin, BJP leh an thurualpui RSS te hmalakna vang a nih thu a sawi a. A bulpui ber pakhat chu CEC Gyanesh Kumar hmang tangkaia democracy pawngsuala vote tichingpena electoral roll atanga mi vaibelchhe tel paih an nih vang niin a sawi.
Congress Bhavan-a Mizoram Pradesh Congress Committee ten political session an neiha thusawitu Lal Thanzara chuan, "Eng vangin nge BJP hi duh lo tur kan nih? Kan Kristianna atanga kan teh vang a ni. Chu vangin, keini hnam tlem Mizo, ringtute hi chuan BJP leh an thawhpuite hi kan hnawl a ngai a ni. West Bengal-ah hmanni lawkah BJP in sawrkarna an lak atang khan Kristiante an chep thar hle a. Pathian biak ina kraws tar te an lak thlaktir a ni," a ti.
"Chu vangin tawngtaina nen BJP leh an talhfiak RSS te lian zel tur dodal tur hian Congress ten theihtawpa tan kan lak a ngai a, kohhran te pawhin tawngtaina nena tan kan lak a ngai hle a ni," a ti bawk.
“BJP hi a sawrkar zel a nih chuan min enkawl tum dan hi keini hnam tlem, Mizo Kristian te tan chuan thil rapthlak tak a ni. BJP lian zel tur hi tih tak zeta do a, hmachhawn a ngai,” tiin Lal Thanzara chuan a sawi.
A sawi zelnaah, “Central-ah Congress a sawrkar laiin NLUP bul an tan a, kum 2014 atangin BJP an sawrkar a, hektu an awm chungin NLUP sum pawh an pek chhunzawm zel a. Central-ah eng party nge sawrkar tihah Mizoram Congress a innghat lo. NLUP hmang bawkin Mizo mipuite retheihna atangin khai chhuah a tum leh dawn a ni,” a ti.
“Politics hi mihring din ni loin Pathian din a ni tih Presbyterian Sunday School zirlaiah pawh kan zir a. Pathian atanga chhuak a nih chuan Pathianah bawk a tawp ang. Khawvel politics-ah hian Pathian a inrawlh a, Mizoram politics-ah pawh a inrawlh a ni. Pathian malsawm tlaka thawhrim a ngai,” a ti bawk.
