India Hnampa Mahatma Gandhi piancham vawi 157-na (Gandhi Jayanti) pualin tukin khan Mizoram Larsap Gen (Dr) V.K. Singh (Retd) leh sawrkar mi pawimawhte chuan MINECO, Aizawl-a Gandhi limah pangpar dahin zahna an lantir.
Zahna lantirna hun buatsaihah hian Larsap bakah Mizoram sawrkar cabinet minister thahnem tak an tel a. Home Minister K. Sapdanga, AH&Vety Minister C. Lalsawivunga, EF&CC Minister Lalthansanga, School Education Minister Dr. Vanlalthlana, I&PR Minister B. Lalchhanzova leh RD Minister Prof. Lalnilawma te an tel bakah, Chief Secretary Khilli Ram Meena, DGP Sharad Agarwal leh official pawimawh thahnem tak an tel a ni.
Pangpar dah zawh hian Mahatma Gandhi zirtirna ropui tak - faina leh vantlang tana inhlanna nun lantir nan, Larsap, Minister-te leh sorkar hotuten Swachhata Hi Seva beihpui pualin a hmun tual phiatin faina hnatlang an nei zui nghal bawk.
