Govt. Hrangbana College-a Weber Club (Civil Service Aspirant Club) te chuan DC Office, Aizawl, Land Revenue & Settlement Department leh Urban Development and Poverty Allevation (UD & PA) te sponsor in October 13 leh 15, 2026 ah Inter-Departmental Debate Competition an buatsaih.
October 13 ah topic pahnih “NEP 2020 hnuaia subject hrang hrang kan zir hi kan hlawkpui” tih leh “Tourism lama hma lak hi kan ram economy than zel nan a tha ber a ni” tih an hmang a. Final round-ah chuan “Ram hmasawnna hi hruaitu thaah a innghat a ni” tih hmangin Department pali te an intihsiak a. Mover-ah Commerce leh History te an tang a, Opposer-ah Political Science leh Public Administration te an awm thung.
Best Debating Department-ah Commerce thlan niin Lallawmawma leh Gospel Visionmawii te chuan pakhatna lawmman an la a. Pahnihnaah History niin pathumna chu Political Science Department te an ni thung.
NEP 2020 in ‘All round Development’ a kalpuinaah hian lehkha zirna ngawr ngawr aiin mihring talent hai chhuahna a kalpui ber a ni tih hre rengin Weber Club hian talent hai chhuah chu a tum ber a ni a. Tunah pawh hian Weber Club hian MS Academy te nen thawk hoin Hrangbana College-ah Civil Service Coaching Centre hawngin Civil Service exam hmachhawn tumte man tlawm takin an kal mek a ni.
