Ni 6 chhung thang tura Hachhek bial kuthnathawktu 50 zin te chuan 1.10.2026 ah khan Lengpui Airport atangin tluang takin New Delhi an thleng a, Hachhek bialtu MLA Robert Romawia Royte te nupain New Delhi-ah an lo dawngsawng a ni.
Hachhek Farmers Tour hi Vanapa Hall-ah Capt HS Lalawmpuia, Dawrpui Corps Commanding Officer in a vai liam.
Lalpekkima, PA to Hachhek MLA in report tawi pein Hachhek kuthnathawktute zinna tur atan hian Hachhek bialtu MLA in Agriculture Ministry ah rawtna a thlen a. Dan angin Mizoram Horticulture Department in forward in Agriculture Ministry in Rs. 3,92,000 an phalsak a. Bialtu MLA in a bial te hi thlawhna ngeiin an kal lam chu kal se a tih avangin thlawhna ticket man zawng zawng Rs. 5,06,000 bakah tul dang atan Rs. 1,00,000 a tum a. NECS in t-shirt leh he Tour-a tul dangte an sponsor ve bawk tih a sawi.
New Delhi-a kal ve Hachhek MLA Robert Romawia Royte chuan a bial huan siamtuten central sawrkar leh Mizoram Horticulture Department duhsakna changa Delhi leh a chhehvel an fang thei chu lawmawm a tih thu a sawi a, an hlawkpui ngei a rin thu a sawi bawk.
Delhi-a Hachhek kuthnathawktu zinte hian Zirtawpniah Qutub Minar, Lotus Temple, Red Fort, Parliamment, India Gate leh hmun pawimawh dangte Tour Guide kaihhruaina hnuaiah an fang kual a. Inrinni lamah chhunzawmin zanah Hachhek Nite hlimawm tak Hachhek MLA nupui Lalrampari’n a buatsaihsak dawn a, zaithiam TBC Zaithanpuia, Ruat Ruati leh a dangte an che dawn a ni. Sawrkar laipuia thuneitute pawh Hachhek Nite-ah hian tel tura beisei an ni.
He team-a Asst. Leader Kanan-a, Hachhek Bial Kuhva Chingtu Pawl President chuan bialtu MLA in Hachhek bial kuthnathawktute duhsaka Tour a neihpui chu lawmawm an tih thu sawiin, kumina MLA Fund hmanga kuhva nuai 1 mirethei ten an phun pawh a nung tha hlawm niin kan hria a, a lawmawm hle a ni a ti.
