Home Minister K. Sapdanga chuan vawiinah khan Aizawl Press Club-ah chanchinthar thehdarhtute a kawm a, 22.09.2026-a Mizoram Gazette-a tihchhuah 'The Mizoram Regulation of Fireworks Act, 2026' chungchang sawi fiahin, he Act hnuaiah hi chuan hremna a na hle tih a sawi.
K. Sapdanga chuan The Mizoram Regulation of Fireworks Act, 2026 hnuaiah hian mumal taka halpuah leh a kaihhnawih dangte khap dan tur duan a nih thu a sawi a. Dan bawhchhiatna hrang hrang leh dan bawhchhetute hremna te bakah hemi dan kenkawh kawnga mawhphurtute leh an mawhphurhnate a sawi a ni.
The Mizoram Regulation of Fireworks Act, 2026 hnuaiah hian Deputy Commissioner phalna la hmasa loin halpuah leh a kaihhnawih hal, hman leh kawl phal a ni lo tih a sawi a. Explosive Act. 1884 hnuaiah phalna nei lo tan chuan halpuah leh a kaihhnawih dangte zawrh leh hralh phal a nih loh thu a sawi bawk.
Tu pawh, The Mizoram Regulation of Fireworks Act, 2026 section 3 leh section 4 bawhchhia a, phalna nei loa halpuah leh a kaihhnawih dang hal emaw, lo kawl emaw chu thla thum thleng lung in tantir emaw, Rs. 50,000 chawitir emaw a hrem theih a ni a. Pawi khawihtu chu naupang kum 12 hnuai lam a nih chuan an nu leh pa emaw, naupang enkawltu chungah emaw hremna hi pek tur a ni.
He dan section 3 leh 4 bawhchhetu chu sawrkar hnathawk a nih chuan thla ruk thleng lung in tantir emaw, Rs 1,00,000 chawitir emaw a hrem theih a ni a. He dan section 5 bawhchhia a, phalna nei loa halpuah leh a kaihhnawih zuartu chu Explosive Act. 1884 angin kum hnih thleng lung in tantir a, pawisa chawitir emaw, lung in tantir leh pawisa chawi khawp tura hrem theih a ni.
The Mizoram Regulation of Fireworks Act, 2026 hnuaiah sawrkar hnathawk dan bawhchhia an awm chuan cheng nuai 1 thleng pawisa chawitir theih an ni
He dan hnuaia dan bawhchhiatna hi congnizable bailable a ni thung a, magistrate phalna la hmasa kher loin dan bawhchhetu lakah police te'n thubuai an ziak lut thei a, police te'n bail-in an chhuahtir thei a ni.
