Mizoram Pradesh Congress Committee (MPCC) thupuangtu Dr. Lallianchhunga chuan Mizoram pawn private hospital te awlsam tak leh rate tha taka MUHCS hnuaiah inremna ZPM sawrkarin a ziahpui thei laia, state chhunga private hospital tha tak tak te nen inremna kawng zawng lo a, Pharoa thinlung khauh tak ang Health Minister in a la pu tlat chu hriatthiam harsa an tih thu a sawi.
MPCC thupuangtu chuan MUHCS 1.0-ah khan Synod Hospital hian damlo 5,968 an nei a, a bill chu cheng vaibelchhe 15 vel a ni a, chu chu chawhrualin cheng 20,299 ang a ni a ti a. Synod hnuaia damdawi in tho John William Hospital chuan damlo 281 an nei a, an bill chawhrual chu cheng 23,188 a ni tih sawiin, hetih lai hian Kolkata-a damdawi in pakhat bill chawhrual chu cheng 1,70,000 a ni a ti.
Dr. Lallianchhunga chuan MUHCS-a inziak lut si, Mizoram chhung MUHCS Empanelled Hospital a khum chang lo tam tak, private hospital-a enkawl ngai damlo eng emaw zat an awm reng thu sawiin, heng damlo te tan hian rorelna dik an phut tlat thu a sawi. Mizoram chhunga MUHCS la zawm ve lo private hospital chauh an ni tawh a, an grade mila MUHCS zawm ve an hreh loh thu sawrkarah an thlen tawh chungin sawrkarin chhuanlam siama tihkhawtlai ngar ngar a tum a ang a ti bawk.
"Minister-in 'Pawl kan dawr tawh dawn lo, damdawi in mal zelin kan dawr tawh dawn,' a tih hi Mizoram pawna damdawi in te a mal te tea dawr a, rate sang tak tak an pawmpui dung zuia kalpui a tum hi eirukna kawngkhar inhawn theihna niin kan hria," tiin, Pharoa thinlung ang maia a thinlung tikhauh lo turin Health Minister hi an beisei thu a sawi bawk.
Congress thupuangtu Dr. Lallianchhunga chuan MUHCS chungchangah tun hnaiah hian sawrkar leh Synod Hospital inremna lo lar thar leh hluaiah pawh Synod Hospital pawhin demna a tawk lek lek mai chu fel lo an ti a, hei hi a chhan chu MUHCS chungchanga rorelna dik a awm loh vangah Congress party chuan an ngaih thu a sawi. Synod Hospital hi chuan lang tlang takin thil tih an duh an rin thu a sawi a, ZPM sawrkarin Confidential Clause a siam avanga lang tlang takin thil an ti thei lo ni zawkah an ngaih thu a sawi bawk a ni.
