Health Minister Lalrinpuii leh Excise & Narcotics Minister Lalnghinglova Hmar kaihhruaina hnuaiah Mizorama khuh damdawi hmansualna hluar ta lutuk chung chang sawihona ‘Inter-Ministerial Meeting’ chu Thawhtanniah SAD Conference Hall, MINECO ah Health Department hotute, Excise & Narcotics Department hotute leh Central YMA hotute chuan an nei.
Ruihhlo hlauhawm leh buaipuiawm bera ngaih heroin a van chhoh tak deuh avangin mi tam tak chu damdawi ruih theih lamah an tlan tih sawi a ni a, damdawi ruih nana hman sual theih thahnem tak man a nih tawh thu te, damdawi zuar licence neitu ngei pawh an damdawi lak luh leh zawrh dan fel lo avanga mi eng emaw zat man leh court-a thubuai siamsak an awm tawh thu sawi lan a ni bawk.
Codeine syrup chu damdawi hman sual hluar ber a nih thu sawi niin, damdawi zuartuten Mizoramah an la lut tam hle a, doctor chawh chauha hralh tur ni mah se doctor chawh lohin a luangral tam hle a, thalai rual leh mi pangngai tak tak, naupang chenin an hmang sual nasa hle tih sawi lan a ni.
Khuahkhirhna a nasat avangin damdawi dawr pangngaiah chuan mamawh tan pawh lei tur a vang hial tawh zawk a. Amaherawhchu, a ruk a rala hralh a nasa a, damdawi zuar thenkhatte bakah Medical Representative inti tam tak hetiang damdawi ringawt buaipui hi an tam hle tih sawi niin, codeine syrup bakah ruih theih chi hrang hrangte hian Mizoram hmun kilkhawr ber thlengin a thleng deuh vek tih sawi lan a ni bawk.
Mi thenkhatte thil tih pawi tak, codeine syrup ni reng si damdawi dang daih anga lantir nana damdawi label dang daih bel, damdawi bur eng emaw zat man a nih thu tarlan a ni a. Hei hi phai lama tute emaw thurualpui neite thil tih niin, heng damdawi zawrh kawnga inhnamhnawihna nei mi eng emaw zat man an ni tawh a, a siamtu ngei man chhuah dan tur sawi ho niin, Excise & Narcotics Department-in ngawrh takin investigation an kalpui mek chu lo bawhzui zel se, FDA leh Central YMA pawhin an hmabak lo bawhzui zel se tih a ni.
Dan loa damdawi ruih theih theh darh thintute dap chhuahna kawngah thawhhona tha zawk neih dan tur sawi ho a ni a, thawhhona tha tak hnuaiah damdawi hmansualna pawi tak hi tihreh theih beiseina lian tak meeting chuan a nei a ni.
Hun remchang hmasaah Minister pahnihte kaihhruaina bawkin tun tum meeting member-te bakah Mizoram Chemists & Druggists Association, Mizoram Medical Representative Association leh Mobile Drugs Dealers Association tela meeting neih leh nise tih rel a ni bawk.
