Gauhati High Court chuan Health Worker post 100 direct recruitment-a la tura Mizoram sawrkarin advertisement a chhuah tawh chu 1.10.2026 ah khan a thiat a. National Rural Health Mission hnuaia contract Health Worker thawktu zingah a ngheta dah theih an awm em tih ngaihtuah hmasak a nih hnuah advertisement thar tichhuak leh turin a hriattir.
Justice Mridul Kumar Kalita chuan State sawrkar chu post awm zat atangin engzat nge Government of Mizoram Regularization of Centrally Sponsored Scheme (CSS) Employees Scheme, 2024 hnuaia hna thawk lai mek, contract Health Worker te zingah a ngheta dah theih an awm em tih chhut hmasa turin a hriattir a. Direct recruitment tura post bang la awm teah advertisement an chhuah leh hmain 2024 scheme dan leh inkaihhruaina angin sawrkar chuan a ngaihtuah hmasa phawt tur a ni a ti.
He thubuai hi 2007 kuma Health Worker Training zo 72 leh National Rural Health Mission hnuaia contract-a thawk tura lakte thehluh a ni a. Mission Director, National Health Mission, Mizoram State Health Society chuan DPC/Selection Board te recommend-na angin thawktu atan a la a. Thla 4 chhung atan, thla khata Rs. 7,000 hlawh tura lak phawt niin, an contract chu pawh sei zel a ni a, chawl miah loin kum 18 chuang an thawk zui a ni.
2017 ah khan Health Worker 93 te chu special recruitment scheme hnuaiah a ngheta dah an ni tawh a. Hemi hnuah hian CSS hnathawktu 354 chuang erawh contract-in an la thawk a. Chumi hnuah, CSS hna thawktute ngenna angin 2024 ah khan Mizoram sawrkar chuan CSS employee te a ngheta dah an nih theih dan tur scheme a siam a. July 2025 ah khan sawrkar chuan 2024 scheme angin a nghet a dah theih tur an awm leh awm loh en fiah hmasa loin direct recruitment kal tlanga Health Worker post 100 la turin advertisement a chhuah a ni.
Thubuai thehluttute hian CSS hnuaiah thawktu 354 chuang contract-a thawk an la awm mek a, contract-a thawktu awm sa te pawh a ngheta dah an la nih loh lai a, direct recruitment-a thawktu 100 chuang la tura sawrkarin advertisement a chhuah chu an duh lo a ni.
