Khawvela scientist tha rual thlan chhuah, Elsevier leh Stanford University tangkawpin an buatsaih 'Global Top 2% Scientists 2026' list-ah Mizo scientist Dr. Lalduhsanga Pachuau a tel.
Dr. Lalduhsanga Pachuau hi Pu Thangsavunga leh Pi Lalhlimpuii, Zemabawk, Aizawl te fapa a ni a. Kum 2015 atang khan Assam University, Silchar-ah Assistant Professor hna thawk mekin, a zirna lamah hian Dibrugarh University, Assam atangin B.Pharm atanga PhD thleng a zir chhuak a ni.
M.Pharm a zir chhungin MHRD, Govt. of India hnuaiah GATE Scholarship a lo dawng tawh a. Assam University-a a luh hma hian kum 2007 atanga 2014 chhung khan RIPANS, Aizawl-ah Lecturer a lo ni tawh bawk.
Dr. Lalduhsanga hian a hnathawh that avangin chawimawina hrang hrang a lo dawng tawh a. Kum 2019 khan Bangkok-ah Society for Pharmaceutical Education & Research leh Thai Industrial Pharmacists Association tangkawp chuan 'Young Scientist Award' an lo hlan tawh a. Kum 2017 ah khan 'DBT-ISNM Fellowship' a dawn bakah, Anna University leh NIPER-a International Conference hrang hrangah 'Best Poster Award' a lo dawng tawh bawk.
Kum 2019 ah khan Dr. C. Zothanmawia nen tangkawpin 'Damdawi leh a kaihhnawihte' tih lehkhabu an lo ziak tawh a ni.
