Mizo National Front (MNF) chuan vawiinah khan chhung inkhawm an hmang a, he huna thu sawitu MNF Senior Vice President Dr. R. Lalthlengliana, MLA chuan kut phuara an awm laia MNF eirukna chhui ngei tura ZPM sawrkar an ngen ngawih ngawih thu a sawi.
Dr. R. Lalthangliana, MLA chuan ZPM worker thenkhatin MNF sawrkar kha corruption a fihlim lo, hlemhletna neiah an puh fo tih sawiin, "Thudik lo a ni tih ka puang a, dawta inpuh chhiatna mai mai a ni. Tunah hian dawta min puh fotute khan thuneihna an chan lai a ni a, a chhuitu department zawng zawng pawh an thuhnuaiah an awm lai a ni a. Keini kut phuara kan awm lai tak hian mipuiin thudik an hriat chian theih nan min chhui ngei ngei turin ZPM sawrkar ka ngen ngawih ngawih a ni. Pathian leh mipui zarah rorelna MNF in a chelh leh hunah hlemhletna leh eirukna hian chhete pawhin hmun a nei dawn lo a, eirukna tireh tura awmze nei taka hmalakna mumal tak kan duang dawn a ni," a ti.
MNF Sr. Vice President chuan thudik lo hmanga mi bum leh tih chiai tum a, nitin hnaa neitute bula awm chu a tihbaiawm thu sawiin, "Hetiang politics khelhna hmanruaa hmang fo thin te hian an daih rei ka ring lo. Politics-a khingpuite dawt leh thu belh chian dawl loa beitute hi nakin lawkah mualpho takin an awm thei tih hria ila, MNF chuan kan ching ve tur a ni lo. Health care bill MNF in a bat ralsak an tih fote hi dawt hmanga inbeihna a ni," tiin health care bill kha an hun lain naia khat pawh bat ralsak a awm loh thu a sawi.
