Mizoram Pradesh Congress Committee chuan niminah khan political session an nei a, MPCC General Secretary MS Dawngliana'n thu sawiin, "Kum 2026-ah Presbyterian kohhran chuan 'Kristian te leh ram rorelna' tih kan zir a, ram leh hnam rorelna hi party leh Minister leh MLA te kutah ni loin Pathian leh mipuite, ro an relsakte kutah a awm a ni tih kan hriat nawn fo a tha,” a ti.
“Ram leh hnam tan thu tha leh ropui tak tak insawithiamsiak leh insawi rinawmsiak ni loin, kan ram leh hnam tan hian ro tling leh hmasawnna inthawh tam siakah party te kan inel zawk tur a ni a. Dawt hi vawikhat sawi tawh chuan chumi thupna atan chuan dawt bawk sawia chhilh a ngai tawh thin. Ram hruaitu dawt sawi ching te hian mipuite hmasawnna tak tak leh tih tur an intiam te aiin an mimal leh politics-a an din khawchhuahna atan dawt an sawi tam ber thin. Politics-a an mimal dinhmun humhim nan leh eiruk thup bo nan dawt an sawi tam ber thin. Hruaitute tlawn avang leh party ruih chilh avanga hotute dawt sawi lo chul mam hna bera lo nei an tam ta lutuk hi kan ramin a chhiatpui ta hle a ni,” a ti bawk.
MPCC General Secretary chuan, “Congress party hi kan tha ber, kan fel ber kan ti lo, kan hotu kal ta ten kan ram leh hnam tan an theihna zawng zawng an lo hmang tawh thin a. Thangtharte tan ro tling tam tak min hnutchhiahsakin, kan tu leh fa te hun kal zel tur thlirin an theihna an lo hmang tawh thin a. An sulhnu chhunzawm leh tur hian Zoram mipuite hian kum 2028 inthlanah hian Pu Lal Thanzara kaihhruai Congress party hi sawrkarna pe leh turin ka ngen che u a ni,” a ti.
“Pathian leh mipui zarah kan sawrkar leh chuan mahni unaute pawisa kawl ve teuh lo tur, UNATTI loan lak ngai ve lo tur, Lal Thanzara hoin hmasawnna tluantling leh tlo zawk nei turin thangtharte tan kan hotu hmasate hmalakna chhunzawm kan tum a ni,” tiin MPCC GS chuan a sawi.
