Vana Pa Hall-a ni riat chhung Lehkhabu Pho Runpui Thawh 6-na (LPR-6) neihah Rs. 16,63,780 man lehkhabu hralh niin inhralh tam ber kum a ni a, Rs. 6,52,047 in nikuma an hralh zat an khum bawk.
Mizo Writers’ Association (MWA) in lehkhabu ziaktuten anmahni ngeiin an lehkhabute an zawrh chhuah theihna tur a buatsaih, October 16 atanga tan hi Inrinni tlaiah khan khar a ni a, ni riat chhung hian tlawhtu an tamin mipuiin an hlut hle.
Kumin tih loha an inhralh tam ber chu kum 2023 LPR-3 kha niin Rs. 10,22,178 man an inhralh kha a ni a. Kuminah hian Rs. 6,41,602 in an khum a ni.
Kum 2025-a LPR-5-ah khan Rs. 10,11,733 man an inhralh a, kuminah hian an khum hneh hle a. Zirtawpni bikah khan Rs. 2,70,050 man hralhin LPR buatsaih tawh zawng zawnga ni khata inhralh tam ber tum a ni bawk.
MWA hian kum 2019 ah khan a vawi khat nan LPR hi buatsaihin hripui lengin a tihbuai hnuah kum 2022 atang khan kum tin an chhunzawm a. Kumina Organising Committee Chairman, Dr. Lalsangzuala chuan, “Digital khawvela kan chen tawh laia lehkhabu la chhiar thin leh chhiar tum heti zat kan la awm tih hriat hi a nuam tak zet,” a ti.
MWA President R. Lallianzuala chuan nakkum hi an pawl kum 50-na a ni tih sawiin, hemi denchhen hian LPR hi uar leh lian tham zawka buatsaih an tum tih a sawi bawk.
