Congress party chuan Congress Bhavan Golden Hall-ah political session hmangin, he hunah hian Congress thupuangtu, Dr. Lallianchhunga, MPCC General Secretary ni bawk chuan thu a sawi a, Congress in Mizo thalaite tan zalenna dar an vaw dawn tih a sawi.
Dr. Lallianchhunga chuan, “Congress party chuan Mizoram hmasawnna tura kan hmathlir tarlanna, Manifesto buatsaih turin hma lak mek a ni a. Congress party chauh hi Manifesto rintlak leh belhchian dawl mipuite hnena pe thei tur awm chhun a ni. ZPM in an Manifesto eng atan mah an ngai tawh lo a; MNF lahin mipuite hnena zawrh tur Manifesto an nei tawh lo. An intiamna an hlen theih loh avangin 2023 ah mipuiin kan paih thla fel chauh a, zawrh thar leh tur an nei tawh lo. Congress party chiah hi Manifesto rin ngam leh huap zo mipuite tana theh thei tur awm chhun kan ni,” a ti.
MPCC Spokesperson chuan Dr. Lallianchhunga chuan, “Kan sawrkar huna kan ngaihpawimawh tur zingah thalai lehkhathiamte hma hun hi uluk takin kan thlirpui a, Mizoram hmasawnna atana asset pawimawh tak atan hman kan tum dawn a. MZU hnuaiah hian kum tin Ph.D nei thar 100 atanga 200 inkar an awm ziah tawh a ni. Nikumah khan mi 228 in Ph.D an hmu thar a, kan thalai lehkhathiam, zirna lam luhchilh law law ho te tan zalenna dar Congress party in kan vaw dawn,” a ti bawk.
“Congress party hian thalaite dinhmun kan hriatpui a, Mizoram hmasawnna atana an theihna te hmang tangkai zel thei turin kan buatsaih dawn a. Chu vangin, ram leh hnam hmangaihtu, thalai lehkhathiam te chu Congress party thlawp turin ka sawm duh a ni. Tunah a chipchiarin kan sawi rih lo ang; mahse, Congress party chuan a ngaihna hria hruaitu kan nei a. MPCC President in Manifesto Drafting Committee a din a, chutah chuan kan Sr. Vice President Lalnunmawia Chuaungo IAS (Rtd) hi Chairman a ni a. A hoin Congress party Manifesto kan duang dawn a, a rintlak viau ang,” tiin a sawi.
