Mizoram Larsap General (Dr) Vijay Kumar Singh (Retd) hovin vawiin khan Assembly Annexe Conference Hall-ah Mizoram Information Commission (MIC) buatsaih Right to Information (RTI) Week 2026 lawmna hun hman a ni.
He hunah hian larsap chuan Right to Information chu langtlang, mawhphurhna la ngam leh mipui tel vena sawrkar din nana hmanraw pawimawh tak a nih thu sawiin, "RTI hi mi dang do leh ep rana chet lakna hmanrua a ni lova, rorelna khawl leh mipuite inlaichinna phuar nghettu leh inrintawnna siamtu a ni zawk tur a ni," a ti.
Larsap chuan Village Council leh Local Council thlenga RTI huam tir a ni chu lawmawm a tih thu a sawi a; hei hian sawrkar pisa lian zual chauh ni lovin, tualchhung inrelbawlna thleng pawhin langtlang taka hnathawh a tulzia a entir niin a tarlang bawk.
October 5-a tlangzarh tak RTI Online Version 2.0 chu tangkai taka hman a nih ngei a beisei thu sawiin, Section 4 hnuaia sawrkar thil tih mipui hriat tura tlangzarh ngaite chu a theih chin chinah zawhna dawn hma pawha mipui hmuh theiha tarlan thin nise a duh thu a sawi bawk. Thup nei lova langtlang taka kal chu sawrkar kalphung ngheta neih zawk a pawimawh a ti.
He inkhawmah hian college zirlaite tana RTI slogan inziahsiak buatsaiha tithate hnenah lawmman sem nghal a ni:
Pakhatna: Zonunfela, Dept. of Education, Govt. Hrangbana College (Rs 5,000 + Certificate)
"In secret, democracy dies. In transparency, democracy thrives. Seek the truth, expose corruption and demand justice through Right to Information."
Pahnihna: F. Lalthanzuala, Dept. of Public Administration, Pachhunga University College (Rs 4,000 + Certificate)
"Right to Information brings transparency to light, to end corruptions of our nation, we must know our right."
Pathumna: Lalrinnunga, B.Com, Govt. Aizawl College (Rs 3,000 + Certificate)
"Piallei khat theuha piang hringmi tan hriat thiang leh thiang lo a awm bik dawn em ni? RTI dan hmanga hriatna hi mitin dikna a ni."
Inkhawm hi Dr. Lalzirmawia Chhangte, State Information Commissioner chuan a kaihruai a. RTI hmang tangkai thin Pu K. Lalngaizuala (East Lungdar) leh Pu Adam Saprinsanga Halliday (Chaltlang) te'n an tawnhriatte an sawi hnuah Pi Lily, Secretary, MIC chuan lawmthu sawiin hun a khar a ni.
