MizoTaxi application-ah Aizawl khawpuia mihring phur sumdawnna lirthei chi 3, four wheeler taxi, two wheeler taxi leh auto rickshaw 1,894 ziah luh a ni tawh a, MizoTaxi passenger app bik hi mi 30,737 in an download tawh.
Transport Department hotute chuan MizoTaxi mobile app-a inziahluh hun hi vawi 2 pawh sei a ni tih sawiin, a hnuhnung zawk hi September ni 4 ah khan pawh sei a nih thu an sawi a. September ni 30 ah khan hun hawn a ni a, hemi chhung hian lirthei 324 an inziak lut a ni.
Aizawl khawpuia service four wheeler taxi, two wheeler taxi leh auto rickshaw te chu MizoTaxi app-ah hian inziaklut vek turin sawrkar chuan a ngen a. Tun dinhmunah hian lirthei 1,894 inziaklut an awm a, heng zinga 1,402 hi two wheeler taxi niin an tam ber a. Four wheeler taxi 468 leh auto rickshaw 34 an inziak lut bawk a ni. MizoTaxi passenger app bik hi mi 30,737 in an download tawh a ni.
Coordination Committee on Traffic Management-in a rel angin Aizawl Traffic SP chuan kumin September ni 11 ah khan hriattirna a tichhuak a. MizoTaxi-a inziak lutte chu kumin September ni 14 atanga December ni 14 thleng nitin an tlan phal a ni a, MizoTaxi-a inziak lutte chu taxi hma leh hnungah STA-in a pek MizoTaxi sticker tar ngei tura hriattir an ni. MizoTaxi app-a inziak lut lo lirthei dangte erawh an intlan chhawk dan pangngaia tlan tura tih an ni thung a ni.
