Mizo Hnam Run chhung inkhawmah MNF Vice President D. Thangliana, Ex-MLA chuan thu sawiin, MNF chu hnam tana belh tlak awm chhun leh innghahna tlak party an nih thu a sawi.
D. Thangliana chuan, "India leh MNF inrem hnuah MNF ten sawrkarna kan siamah khan kum khat leh a chanve vel hnu lawkah paih thlak kan ni a. Kan inbengbel hman lo a, hruaitu leh sawrkar demna a nasa hman hle a. Mahse, mipui leh kan hruaitute Pathian leh kan ram tana ding tlat mi kan neih avangin kan buaina pawh a rei lo. A hnuah inthlan kan hmachhawn leh a, MLA 14 zinga 5 ten min pensan leh a. Kan hotute chutih vang a ni e kan ti lo," a ti.
“Kum 2018 leh 2023 inkara kan sawrkar chhung khan Covid-19 hri leng avangin khawvel a buai a. India ram leh Mizoram pawh a buai hle a, kan budget cheng vaibelchhe 2371.90 kan dawng ta lo a, harsatna kan tawk nasa hle a. Ni 700 chuang kan inkhar khip chungin sawrkar hmalakna avangin Covid-19 vanga thi tlem ber kan ni," a ti bawk.
SEDP leh sawrkar pilot project chungchang sawiin D. Thangliana chuan, vawk vulh thlangtu chhungkua 220 te cheng nuai 3 theuh pek an nih thu te, ar vulh thlangtu leh Sericulture lam thlangtute cheng nuai khat leh sing nga theuh an pek thu a sawi a. "Kan budget hmuh tur hmu lo chunga SEDP a cheng vaibelchhe 975 lai mai kan sem kha Pathian leh kan hotute thawhrimna vang liau liau a ni," tiin a sawi.
Tun hnaia Manipur lama party hotute tirha an kal chhan sawiin, D. Thangliana chuan, "Manipur-a Hmar, Pawih leh Kuki inkara inrem lohna awm chu kan party chuan tha a ti lo a. Indo lai chauha inlungruala awm lo a, zai khata luang zaa inpumkhat tura an ngenna chu an lo dawngsawng tha hle," tih sawiin, October 23, 2026 ah khian inhmukhawma hma lak ho an tum dawn a ti.
MNF Vice President chuan, "MNF chu party dang ang kan ni lo a, NDA ah awm mah ila, kan ram leh hnam him lohna leh kan that lohna turah chuan kan hotuten an thlawp ngai lo. Political party zinga zui tlak awm chhun, ram leh hnam tana kum 20 zalenna tura che, hnam himna leh hnam tana belh tlak party awm chhun kan ni," a ti a ni.
