MNF Legal Board chuan vawiinah khan Cyber Crime Police Station-ah FIR an theh lut a. FIR hi tunlaia Chief Minister hlui Zoramthanga thusawi ni miah lo, a sawi ni awm taka video siam chawp leh tihdanglam tihdarh vanga theh lut an ni.
Tunlai hian Zoramthanga, Chief Minister hlui thusawi ni miah lo, a sawi ni awm tak video siam chawp leh tihdanglam, “MNF hi Pathian leh mipuite zarah kan sawrkar hunah mipui retheite nuai 5 atanga nuai 15 inkar, kum tin pawisa kan pe dawn,” a tih chu social media lamah a darh chiam mai a. He video darhah hian caption atan thu ziak dah tel a awm bawk niin an sawi.
FIR theh luttu MNF Legal Board chuan caption atan thuziak dah tel chu, “MNF mi leh sa mi tlemte hnenah cheng nuai thum aiah vaimim an lo sem tawh a. Tunah nuai 15 an tiam leh ta, nuai 15 aiah chakai a ni leh mai a, Maurawkela te ho tak zet hi chu aw,” tih a nih thu an sawi bawk.
Legal Board chuan MNF President hian hetiang thu hi a sawi lo hrim hrim a. MNF party leh MNF President tihchhiat nan te, mipui rilru thianghlim tak hruai sual nan tea video siam chawp leh tihdanglam tih a chiang em em a. Hetianga mi zahawm tak, Mizoram Chief Minister kum rei tak lo nia ram leh hnam hmasawnna hna tam tak lo thawk tawh leh a ngaihtuahna pawh ram leh hnam tana la hmang chhunzawm rengtu thusawi ni miah lo, a sawi anga video lo siam chawp leh tihdanglam hi BNS Sec. 336 (4) bawhchhiatna lian tak a ni an ti.
He video siam chawp thehdarhtute chu ZPM Media & Publicity Department Chairman leh Minister of State B. Lalchhanzova, Lalbuaia Vanchhawng leh Marini ZPM (Lalrinmawii D/o Lalzawnchhuaha (L) R/o Khawzawl Vengthar) te an nih thu leh an post darh na link leh pawimawh dang te MNF Legal Board chuan an tarlang a ni.
MNF Legal Board chuan hetianga ram hruaitu lo ni tawh leh mi zahawm tak thusawi loh pui sawi anga electronic record leh document lem lo siam hi dawt hmanga MNF President Zoramthanga, Chief Minister hlui nasa taka tih hminghliaua tihchhiat vek tumna leh MNF party tihchhiat vek nana mipui bum tumna ngialngan tak a nih avangin dan bawhchhiatna lian tak niin an sawi a. BNSS Sec.173 hnuaiah FIR register a, a siamtu leh thehdarhtute hi zawn chhuahsaka dan anga hrem an nih ngei theihna tura hma laksak turin MNF an ngen bawk a ni.
