MPCC Treasurer Dr. Lalmalsawma Nghaka chuan October ni 1, 2026 ah Mizoram chak lak luhna pui ber Kawnpui leh Bilkhawthlir inkar kawngpui a en fiah.
Dr. Lalmalsawma Nghaka chuan Mizoram kawngpui siamna turin petrol leh diesel atangin mipuiin chhiah kan pe a, he kawngpui siamna atana mipuiin chhiah kan pek tling khawm zat chu nuai 17,000 chuang a ni tawh tih a sawi a. Heti chunga kan chak lak luhna kawngpui ber heti em ema a chhia hi chu Mizoram sawrkar inthlahdah vang liau liau a nih thu a sawi.
Mizoram kawngpuite chu tunah hian hmun hrang hrangah a chhe hle niin Dr. Lalmalsawma Nghaka chuan sawiin, hei aia chhia kawngpui hi kan la nei ngai lo a ti a. Damlo na tak inphurhna atan kan kawngpui hi a hlauhawm a, damlote pawhin harsatna an tawh phah nasa hle a ti. Kawngpui chhiat avanga damlo damdawi in thleng hman loa nunna chan tate an awm chu a vanduaithlak hle tih a sawi bawk.
AMC inthlan dawna mipui vote zawnna atana hmanhmawh taka kawngpui an siam pawh tunah hian a chhe nasa leh hle tawh tih sawiin, kum 15 daih kawng kan siam ang tia tiamtute hian fur khat daih pawh an siam thei lo a ni a ti.
Dr. Lalmalsawma Nghaka chuan tuialhthei atanga kawngpui siamna mipuite chhiah pek hnuah pawh kawngpuiin a that phah lo chu mipuiten an tuar hle a ni tih sawiin, lirthei neituten an lirthei thawm thatna atan sum tam tak an sen bakah ni dang aiin tuialhthei an hman tam zawk avangin lirthei neitute tan phurrit nasa tak a tling a ti a. Mizoram sawrkar hian kawngpui a siam tha thei ngang lo a nih chuan mipuia tuialhthei hmanga chhiah a lak hi titawp turin Mizoram sawrkar a ngen nghal thu a sawi.
