Sawrkar laipuiin sumdawnna te thamte chawikan nana a duan, Pradhan Mantri MUDRA Yojana (PMMY) scheme, Mudra Loan tia hriat hmangin kum 11 chhungin India ram pumah bank account vbc 57.79 ah loan cheng vbc nuai 40.07 pek a ni tawh a. PMMY report 2025-26 in a tarlan danin Mizoram chu India rama state leh UT 37 zinga Mudra Loan pek chhuah tam lamah 29-na a ni.
PMMY Report 2025–26 in a tarlan danin, kum 2025-26 chhung khan Mizoramah Mudra Loan hi bank account 28,327 ah cheng vbc 655.67 pek a ni a. Ram chhung state leh Union Territory 37 zinga Mudra Loan pek chhuah tam lamah 29-na a ni.
Sawrkar kum 2025-26 chhung vek hian Mizorama Regional Rural Bank (RRB) lian ber, Mizoram Rural Bank (MRB) chuan PMMY scheme hnuaiah hian loan cheng vbc 62.64 an sem chhuak ve bawk.
PMMY hi Prime Minister Narendra Modi-a’n April 8, 2015 ah khan a tlangzarh a. He scheme thil tum ber chu bank hlat leh sum pukna hmu zo ve lote hnen thlenga sum hman puk tur pek a ni. Sumdawnna lian lote leh sumdawnna kaihhnawih eizawnna bul tan tharten sumdawnna lian zawk an neih theih nan bank sum an puktir thin.
