Mizo Zirlai Pawl (MZP) hruaitute chuan Zirtawpniah khan School Education Minister Dr. Vanlalthlana chu a pisaah hmuin, MZP rorelna sang ber Assembly a rorel bawhzuina leh College hrang hrang buaina an thlen.
He inkawmhona hunah hian MZP hruaitute chuan MZP Assembly rorel bawhzui nan Minister hnenah thil chi hrang hrang an thlen a. Mizoram chhunga college hrang hrang ten an mamawh bus an neih theih nan hma la turin Minister hi an ngen a. CUET, NEET leh All India Exam ah Mizo zirlaiten Exam Centre chungchangah harsatna an tawh thin avangin Mizoram-ah Computer Based Test (CBT) Exam Centre dah belh a nih theih nan hma la turin an ngen bawk.
MZP chuan Zofate inpumkhat lehzual theih nan sikul zirlaibuah Mizo hnam hrang hrangte chanchin telh a nih theih nan hma lakpui turin Minister hi an ngen bakah zirlaibuah Mizo tawng dik tak hman a nih theih nan hma la turin an ngen bawk a ni.
School Education Minister chuan Mizoram chhunga college hrang hrangin bus an neih theih nan hma lak mek a nih thu leh bus driver nei sa te tan ngaihtuah hmasak a nih tur thu a sawi a. Computer Based Test (CBT) Exam Centre pawh neih belh a nih theih nan computer pawh ngaihtuah belh mek a nih tawh thu leh 600 chuang lei belh leh turin ruahmanna a awm mek thu a sawi.
Minister chuan Mizo hnam chi peng hrang hrang chanchin chu zirlaibuah telh an tum thu a sawi a, zirlaibua Mizo tawng dik tawk lo pawh siam that a nih tawh thu MZP hruaitute hi a hrilh a ni.
Heng bakah hian MZP hruaitute chuan October ni 27, 2026 ‘Zirlaite Ni’ leh MZP din champhaphak ni bawk chu Mizoram chhung school hrang hrangah thupui nei chunga hun hman ngei a nih theih nan Minister hi an ngen a, College SU Leader ten tun hnaia buaina an tawh hrang hrang pawh an sawipui a ni.
