Pachhunga University College (PUC) chuan an College campus ah kum thum dana an hman thin Cultural Day vawi 5-na chu October 1, 2026 ah khan an hmang.
He hunah hian chawimawina an hlan thin Laisuih Award chu Rini AI Speech application siam chhuaktu Zoram Thanga hnenah an hlan a. Zirlai leh a thawkte chu hnam bil inchei hrang hranga an inchei bakah zai leh hnam lam hrang hrangte nen hun an hmang a ni.
PUC Cultural Day vawi 5-naah hian Governor General (Dr) Vijay Kumar Singh, PVSM, AVSM, YSM (Retd) chu khuallian niin, Education Minister Dr. Vanlalthlana leh Power Minister F. Rodingliana te khualzahawm an ni a, Prof. Dibakar Chandra Deka, Vice Chancellor, Mizoram University chu Special Invitee a ni.
PUC Cultural Day souvenir Echoes chu Principal Prof. H. Lalthanzara'n a tlangzarh a. Principal chuan PUC-ah hian zirlai 3000 chuang awmin, an zingah hian ram dang 10 atangin zirlai 13 an awm a, India ram state hrang hrang 15 atangin zirlai 64 an awm niin a sawi a. Hnam hrang hrang awm khawmna a nih avangin Cultural Day hi an ngaipawimawh hle a ni a ti.
PUC Cultural Day puala hlan thin Laisuih Award hi Mizo hnam tana kawng hrang hranga thawh hlawkte hnenah hlan thin a ni a. Kumina he award dawngtu Zoram Thanga hi Instaword company dintu niin, Rini AI Speech application a siam chhuak a. He application hmanga Mizo tawng humhalh leh tihhmasawnna kawng hrang hranga a thawh hlawk avangin Laisuih Award hi hlan a ni.
Rini AI Speech hmang hian Mizo tawng hi sap tawngin dik leh awlsam takin a lehlin zung zung theih bakah sap tawng pawh Mizo tawngin a lehlin theih a. Thu ziak awm sa a chhiar theih bakah mi thusawi chu ziakin a lo dah zung zung thei bawk.
Laisuih Award hi hla phuah thiam leh vantlang rawngbawlna lama inhmang V. Thangzama (2011), zaithiam leh hla phuah thiam Lalnunmawia (Valtea) (2015), zaithiam leh hla phuah thiam Lalnunsanga (T. Melody) (2018) leh Mizo culture leh history lam ziaktu lar B. Lalthangliana (2023) te hnenah hlan a lo ni tawh a ni.
Cultural Day hi hun hniha then a ni a, chawhnu lamah hian cultural item hrang hrang an nei a, zaithiam Esther Hnamte, Lilzo leh H. Vanlalhlana bakah an college chhuak, Lalrinhlui Tlumang, Lalruatpuii Darngawn leh K. Hminga leh Dream Hunter te an zai a. Anni bakah hian zirlai J. Lalruatsangi, Chhawkhlei Cultural Club, PUC Dance Club, PUC Music Club leh EU Choir te an zaiin an lam a, zirtirtu lam atangin Manipuri lam entir a ni bawk. He hunah Mizo Cosplay entir a ni a, hnam incheinaa inchei nalh ber thlan niin a tawpah an chai-ho a ni.
