Public Health Engineering (PHE) Department chuan Aizawl khawpui hmar lam, Dawrpui atanga hmar lam zawng chawmtu 'Greater Aizawl Water Supply Scheme Phase III' chu fur ruah tui nasa tak vangin a nih tur ang a ni thei rih lo niin thuchhuah an siam a. Tlawng tui pump na jackwell chu chirhin a hnawh khat a, hei vang hian August 29, 2026 atang khan Setlak tui chu gravity a lain tui hi pump hram hram a ni tih an tarlang.
Tun dinhmunah Tlawng tui pump turin chirh hi then fai mek a ni a, Setlak tui hi a kam chho zel a, pump mamawh khawp tui hmuh theih a ni tawh lo a. Hemi avang hian mipui mamawh zat tui pump theih a ni lo thin a, hei hian nasa takin khawpui chhung tui sem a nghawng mek tih an tarlang a ni.
Aizawl khawpui hmar lamah tui sem a mumal hlei thei lo tih tarlangin, hemi kawngah hian mipuiten lo hrethiam hram turin an ngen a. PHE te harsatna hriatpui a tui renchem kawnga tan lo lakpui zel turin mipuite an ngen bawk a ni.
