PHE Minister Prof. Lalnilawma chuan 37 MLD Water Treatment Plant (Phase-III) a tlawh a, Zodingpuii, Secretary, PHED, Ramchuana, Secretary, Finance Department leh Sushil Singh, Special Secretary, DM&R ten Minister hi an tawiawm.
He hunah hian PHE Minister Prof. Lalnilawma chuan thu sawiin, fur a lo thlenin, lui tui te chu a nut thin avangin PHE Department chuan harsatna an tawk thin tih a sawi a. Tlawnga intake leading channel gate hi chirhin a hnawh avangin tun dinhmunah Tlawng tui hi pump theih a ni lo a, Setlak lui atangin gravity hmangin pump a ni thin a ti a. Minister chuan Setlak lui pawh hi chirh leh hnawlin a hnawh ve reng a, chumi thian fai pah reng chung chuan tui hi pump thin a ni a ti.
Minister chuan Finance leh DM & R hotuten an harsatna tawh te an hmuhpui avangin lawmthu a sawi a, tui chu pangngai taka pump a nih leh theih nan tanrual a pawimawh tih a sawi bawk. Prof. Lalnilawma chuan mipuiten tui hman tur an neih theih nan PHE Department te chuan theih tawp an chhuah zel a ni a ti a. Harsatna hrang hrang avanga hna a khaihlak thin avangin mipuite hriatthiamna a ngen nghal a ni.
37MLD Water Treatment Plant (Phase-III) hi PHE Department hnenah UD & PA atangin August ni 29, 2025-ah hlan chhawn a ni a, PHE Department-in a lak chhawn lai hian Zohnuai-Vaivakawn lei tlahniam avangin pumping-main hi a chhia a, tui pump theih a ni lo.
September ni 2, 2025 atang khan Aizawl Water Transmission Division North-in a enkawl tan a, September ni 4, 2025 atangin Zohnuai-Vaivakawn lei tla hniam avanga pumping-main chhia siam hna hi tan nghal a ni. November ni 7, 2025 atangin tui pump hna hi chhunzawm leh theih a ni a, tun thlengin tui 3664.791 million litre pump a ni tawh a ni.
37 MLD WTP Intake jackwell hi chirh leh hnawlin a tihbuai nasat thin avangin November 2025 atanga tun thleng hian tui pump hi darkar 739 leh minute 47 a ti khaihlak tawh a ni.
Ruah sur nasa leh tui lianin chirh leh hnawl tam tak a hnutchhiah avangin Intake a Jackwell leading channel Gate hi July ni 8, 2026 khan khar a ni a, a then fai hna hi July ni 20, 2026 atanga thawh niin, July ni 29, 2026 atangin Jackwell-ah tui hi lak luh leh a ni.
Ruah sur nasa leh tui lian avang bawkin chirh leh hnawl tha hnem tak a hnutchhiah leh a, August ni 28, 2026 ah Intake a Jackwell leading channel gate hi khar leh a ni a. Gate hi tun thlengin hawn a la ni lo a ni. He 37MLD water treatment plant enkawl tur hian mi 70 tal mamawh a ni a, tunah hian mi 32 an awm mek a ni.
