Ram pum huapa National Postal Week hman mek pualin naktukah Mizorama Post Office hrang hrangah te Post Office Saving Account hawn runpui bakah Postal Life Insurance leh Rural Postal Life Insurance neih a ni dawn.
Ministry of Communications hnuaia Department of Posts (DoP) chuan kar kalta Zirtawpnia World Post Day lawmna pualin tun kar Ningani thleng khian ram pum huapin National Postal Week lawmna hun a buatsaih a. Postal Department, Mizoram Division-a Marketing Executive H.S. Lalnghakliana chuan Mizoram pawh National Postal Week hian kawng hrang hrangin a inbuatsaih tih sawiin, niminah khan Aizawl Head Post Office bakah Mizorama sub division hrang hrangte chuan zirlaite zingah Quiz leh A Letter to Mother Earth: My Promise to Protect Nature tih thupui hmanga letter writing inelna an buatsaih a ni.
Naktukah Post Office Savings Account hawn runpui an neih dawn bakah Postal Life Insurance (PLI) leh Rural Postal Life Insurance (RPLI) te chu Aizawl Head Post Office bakah sub-office hrang hrang leh D.O. ah te neih a ni dawn a. Nilainiah business meet buatsaihin, an customer lian zualte nen inkawm hona an nei ang a, Ninganiah Post Office-a thawkte leh anmahni dawr thintute tan technology quiz buatsaih a ni dawn tih a sawi.
Post Office Savings Account hi sawrkar laipui thlawpna hnuaiah India Post-a bank account hawn theihna a ni a, pawisa dah tlem ber theih zat, minimum balance chu cheng 500 niin, kum 1 ah zaa 4 in a pung a ni.
Postal Life Insurance (PLI) leh Rural PLI te hi sawrkar laipui thlawpna hnuaia Department of Post-in sawrkar hnathawk, sipaite leh thingtlanga chengte tana man tlawm zawka life insurance tih theihna tur a siam a ni a. He life insurance hnuaiah hian hamthatna chi hrang hrang a dawn theih a ni.
