Non Government Hospital Association of Mizoram (NGHAM) hnuaia Mizoram Universal Health Care Scheme (MUCHS) la zawm lo zinga damdawi in lian pathum, Aizawl Hospital, Ebenezer Medical Center leh Trinity Hospital te chuan sawrkarin Synod Hospital a thawhpui ang rate a nih chuan zawm ve an hnial loh thu an sawi.
Damdawi in lian pathum enkawltute chuan sawrkar leh Synod Hospital ten inremna an ziah ang chuan MUHCS zawm an duh thu an sawi a, an inremna te hi anni pawhin an kalpui theih ve tho a ni an ti a. MUHCS-in hospital te grade an pek dan chungchangah Silver Grade nei anga Synod Hospital sawi chu a dik lo an ti.
NGHAM chuan MUHCS hnuaia grade an siam danah hian Mizoram damdawi in zingah tumah Gold Grade ni pha an awm lo tih an sawi a. Ebenezer Medical Center, Trinity Hospital leh LRM Hospital te chiah Silver Grade ni pha an nih thu an sawi a, Synod Hospital chu Bronze Grade bak an ni thei lo tih an sawi.
MUHCS a inziak lut tura damdawi in te rate an tihsan sak theih zat tarlanah base rate atangin Below Bronze - Upper Crest te chu 10%-in a tihsan sak theih a, Bronze hi 20% a tihsan theih a ni a, Silver hi 30% a tihsan theih a ni a, Gold chu 40% thlenga tihsan theih a ni an ti. Hetih lai hian tuna Synod Hospital rate an tih sanna hi chu MUHCS base rate aia 100% a sang te a ni an ti.
