Mizorama mimal enkawl damdawi in intelkhawm, Non Government Hospital Association of Mizoram (NGHAM) chuan Health Minister-in tun hnaia MUHCS zawm tura a sawm bik nia a sawi damdawi in pathum - Ebenezer Medical Center, Trinity Hospital leh LRM Hospital bakah Aizawl Hospital, Greenwood Hospital, Adventist Hospital, Rosewood Hospital, City Hospital leh Agape Multispeciality Hospital te chiahin UHCS hi an la zawm lo a, heng damdawi in te hian MUHCS zawm an duh thu sawrkar an hriattir tawh a, thil tul leh pawimawh theh luh ngaite pawh an theh lut vek tawh a, sawrkar thutlukna an ngaichang reng zawk tih an sawi.
MUHCS chu an member damdawi in thenkhat chauhin an zawm a nih chuan a zawm ve lo damdawi in te an tlak chhiatna a thlen theih dawn avangin Mizo takin pheikhai rual taka kal tha an tih thu an sawi a. An zavaia an zawm theih nan sawrkar nen an inbiak rem thuai an beisei tih an sawi bawk.
NGHAM chuan damdawi in hrang hrangte chu an damdawi in dinhmun leh grade a inan loh avangin rate pawh a inang vek thei lo tih an hriat thu an sawi a. Sawrkarin damdawi in te grading a pek ang zela awm chungin tuna an dinhmun aia an chhiat lohna tur tal rate pe turin an beisei tih an sawi.
Private hospital dintute chu entreprenuer an ni a, risk sang tak lain medical lama Mizoramin hma a sawn nan an theih ang zela hma la thin an ni tih sawiin, Mizorama entrepreneur zingah thalaite tana hnathawh tur siam tam ber zinga mi an ni tih sawiin, hna an siam piah lamah phai lama damlote refer ngai an tlem zel theih nan leh ram dang atang pawha pan tlak damdawi in nih tumin hma an la mek avangin sawrkar pawhin an tana tha tur a ngaihtuahsak zel ang tih an beisei thu an sawi a. MUHCS an zawm fel theih hma pawhin anmahni pantu damlote tan MR bill theih tala phalsak turin sawrkar an ngen a ni.
