Mizoram hmun hrang hrangah 'MNF din champha vawi 65-na' chu vawiinah khan hman a ni a. A hmanna pui ber Mizo Hnam Run, Aizawl-a buatsaihah MNF President Zoramthanga chuan thu sawiin ram chhung leh pawna MNF member zawng zawng chibai a buk.
Zoramthanga chuan, "MNF chu mihring ngaiha mi tlawm tak takte din leh bul tan ni mah se kan hotu hmasaten Pathian hming lam chunga Mizo hnam thuthlung chi an lo tuh chu thi loin a thang duang zel a. A ral ve lo a, a tlu ve hek lo. Tling lo tak chung pawha 'Pathian leh kan ram tan' kan tih tlatna hi Pathianin mal a sawm a. Mizorama political party lian ber leh nghet ber a la ni ta zel a ni," a ti.
"Mizoramah hian political party leh movement lian tak tak an lo dingin an lo chhuak tawh thin a, wave na tak nen an hun lai chuan an thawm pawh a na thin hle a. MNF pawh pheh thluk tumin an su na thei hle. Amaherawhchu, MNF innghahna thuthlung hmuh thelha MNF an dona kha an tihsual lai a ni thin. An do kha Laldenga leh a hote an ni lo a, MNF an ni hek lo. An do an hre lo a. 'Pathian leh kan ram tan' tih thupuia neitu MNF innghahna kan Pathianin he ram leh hnam enkawl tura hriak a thih party hi na taka pheh thluk tum thin mah sela, Pathian vekin a hun takah a tung ding leh thin a. Innghahna nghet nei lo chu an tlu sawp leh thuai a, an ral leh mai thin," a ti bawk.
MNF President chuan state sawrkarna siam mektute chungchang pawh sawiin, "Tun hunah pawh kan ram kaihruai tura mipui en chhin mek ZPM sawrkar chu movement wave na tak nen bul rawn tanin Mizoram min han kaihruai ta a. 'Pui' hrang hrang nei awm khawm, hram dan pawh chi hrang hrang nei an nih avangin an lungrual hlei thei lo a, an chet dan pawh a hmuhnawm tan viau a ni," a ti.
"MNF erawh chu hram dan inang, Pathian leh kan ram tan titu, thuthlung khat inang vuantu kan ni a. Kan innghahna lungphum kan Pathian hi a rinawm a. Thinlunga amah kan vawn tlatna hi Lalpan tlingah min pawmsak a, beihna nasa tak leh nek behna karah pawh min tung ding leh thin. Kan chakna thuruk pawh a ni," a ti bawk.
A sawi zelnaah, “MNF-in Pathian leh kan mipuite zarah sawrkarna chang a, kan ram enkawl hna a thawh leh theihna turin ngenngawl taka Pathian hnena ka tawngtaina chu, ‘Lalpa i tan, Pathian leh kan ram Mizoram tan,’ tih hi a ni,” a ti.
Martar te sun nan minute khat chhung ngawi rengin an ding a, he ni denchhen hian MNYF Headquarters chuan Mizo Hnam Runa an pisaah a mamawhte tana pek turin 'blood donation' an nei a ni.
MNF din cham hi Lungleiah T. J. Lalnuntluanga, Ex-Minister, PAC; D. Thangliana, Vice President, Hnahthial; F. Aithanga NCC, Kolasib; C. Laram mawia PAC, Cham phai North leh Er. H. Lalzirliana MLA, Adviser te chuan Mamit-ah an hmang a ni.
Mizo Hnam Run, Aizawla hmanna hi MNF Treasurer Lalruatkima chuan kaihruaiin, Upa Dr. H. Lallenmawia, Adviser, GHQ chuan hunserh a hmang a ni.
