Aizawl, October 1, 2026: Land Revenue & Settlement Minister B. Lalchhanzova chuan Nilaini khan Ramhlun Sports Complex leh Zemabawk West (Risk Mual tih ṭhin) huam chhunga house site plan-a ram nei mi 223 hnenah ram neitu nihna nemnghehna, Record of Rights (ROR) a hlan fel ta. He hmalakna hnuaiah hian Ramhlun Sports Complex Rehabilitation Centre House Site Plan huam chhungah land pass 127 sem niin, Zemabawk West House Site Plan hnuaiah mi 96 hnenah sem a ni bawk.
Inhlanna inkhawmah hian Revenue Minister chuan department kalphung siamṭhat chhoh zel a nih thu sawiin, an tum ber chu mipui ban phaka awm a nih thu a tarlang. Mipui laka sawiselna leh vui vaina awmte pawh insiamṭhat nan hmangin, dawr nuam leh rintlak ni tura hma lam an pan zel thu a sawi bawk.
Revenue Department chuan mipui tana awlsamna siam turin kalphung thar ṭhahnem tak an kalpui tawh tih Minister chuan a tarlang a. e-RAM kaltlangin a dil hmasa sa duhsakna kalphung hman a nih tawh avangin minister hmelhriat neih leh neih lohin awmzia a nei tawh lo tih a sawi. Chu bakah ram square metre 5,000 aia lian lo chinah DC-te thuneihna sang tak pek an ni a, chutiang buaipui tur chuan Aizawl-a thuneitute hnena rawn thlen kher a ngai tawh lo a ni. Aizawl khawpui chhungah phei chuan Single Window System hmangin file kal muan chhan leh a tanna officer dawhkan thlengin Assistant Commissioner-te'n computer kaltlangin ni tin an vil zui thei vek tawh bawk niin a sawi.
Minister chuan department chu a chang chuan sual hmel taka a lan ṭhin chhan sawifiahin, "A chhan chu min bum tum tam takin min rawn dawr ṭhin vang a ni a, lo dam thluam hi a harsa ve a ni. Min bum tum hi kan tawng hnem tawh em em a, a dik lo zawk ni reng siin dik zawk nih tumin thiam takin thil an rawn ti ṭhin. Tute emaw intihthiam loh kara lêng department kan ni a, kan fimkhur tak zet," a ti a; mipui tana dawr nuam ni turin an inzirtir nasat thu leh an kalphung pawh a dik chhoh viau tawh thu a sawi.
He ROR semna hun buatsaihah hian Ramhlun Sports Complex lamah bialtu Minister Dr. Vanlalthlana leh Zemabawk West lamah bialtu Minister Lalthansanga te chuan thu an sawi a. LR&S Director R. Lalṭhazuala leh Assistant Director V. Lalrindika te chuan hmalak dan report tlangpui pein, department hotute leh khawtlang hruaitute an tel bawk a ni.
