Social Welfare Department chuan khual khuaa thi ruang phurh man tumsakna, ‘Assistance for Transportation of Bodies of Deceased Persons’ hmangin tun thla ni 8 chhungin ruang 196 phurhna atan cheng 20,95,635 a pe chhuak.
September 2024 atang khan Social Welfare Department hian Mizoram sawrkar ruahman angin khual khuaa thite ruang phurhna senso diltute hnenah ruang phurhna senso tumsakna atan pawisa a pe thin a: Hemi atan hian Mizoram sawrkar chuan kum 3 chhungin kum tin budget-ah cheng nuai 500 theuh a dah tawh a ni.
Ruang phurhna bill hi tun thla October chhung hian vawi 2 pek chhuah a ni a. A vawi khatnaah ruang phurhna lirthei neitu mi 35 hnenah ruang 117 phurhna senso atan cheng 12,10,576 pek chhuah a ni a. A vawi hnihnaah ruang phurhna lirthei neitu mi 27 hnenah ruang 79 phurhna senso atan cheng 8,85,059 pek chhuah leh a ni bawk.
Heng ruang phurhte hi Mizoram chhung hmun hrang hranga damdawi in, ZMCH, Falkawn; Civil Hospital Aizawl, Ebenezer Medical Centre, Greenwood Hospital, Synod Hospital Durtlang, Mizoram State Cancer Institute leh damdawi in dang dang atanga phurh chhuah an ni hlawm a; Phurhna senso hi State Transport Authority rate behchhana chhut niin, ruahmanna awm angin lirthei khalhtu leh buaipuitute hnenah sum hi pek a ni.
