Synod Social Front, Central YMA leh MHIP huaihawtin 2.10.2026 (Zirtawpni) ah Aizawl khawpuiah 'Ruihhlo Do Kawngzawh’ neih a ni a. Junior Department, Intermediate Department, Sacrament Department leh Senior Department zirlai, zirtirtu bakah nu leh pa thahnem tak an tel.
He kawngzawh thupui chu ‘Ruihhlo tel lo hringnun’ tih niin, hmun hrang hrang 6 atangin kawng hi an zawh a. Innghahkhawmna hmun hrang hrang 6 ah hian hunserh hmangin kohhran hruaitute, Central YMA hruaitute leh MHIP hruaitute chuan thu an sawi a, hunserh hman zawhah Lammual panin kawng hi an zawh a ni.
Lammualah hian a huhoin hun an hmang a, Rev. John Raldosanga, Moderator, Mizoram Synod chu Chairman niin hun a kaihruai a. R. Lalngheta, President, Central YMA chuan thutiam a sawi rualtir a, Upa Lallianmawia, Organising Committee Member chuan au rual a hruai bawk a ni.
Rev. Dr. K. Lallawmzuala, Chairman, Organising Committee chuan thuchah a sawi a, Lalrinpuii, Minister, Social Welfare Department chuan thu a sawi bawk.
Kawng zawhnaa telte hian thu ziak chi hrang hrang an ken bakah kawng an zawh pah hian ruihhlo an duh loh thu an au rualpui a ni.
Ruihhlo Do Kawngzawh hi Mizoram hmun hrang hrangah pawh an huaihawt ve bawk a ni.
