Indian Medical Association, Mizoram Government Doctors' Association, Indian Dental Association, Non Government Hospital Association of Mizoram leh Zoram Medical College Faculty Doctors' Association te chuan October 23, 2026 ah khan Siaha-ah Multi Speciality Clinics an buatsaih a, damlo 4,656 zet an en.
Multi Speciality Clinics an buatsaihah hian inentir tura inziak lut 4,934 an awm a, heng zinga 4,656 te chu doctor ho hian an en a. Medicine kaihhnawiha inentir 970 an awm a, surgery kaihhnawiha inentir 214 awmin, hmeichhe kaihhnawih thila inentir 446 an awm bawk a ni.
Naupang inentir 480 an awm a, ENT kaihhnawiha inentir 314 awmin, beng hriatna lama harsatna nei inentir 101 an awm a. Ha lampang entir 268 an awm a, rilru lampang kaihhnawih entir 136 niin, mit entir 650 an awm bawk.
Vun lampang entir 576 an awm a, ruh lampang entir 602 an awm bawk a. Inentir zinga mi 57 chu an chiu a, mi 73 chu endoscopy tih niin, ultrasound tihsak mi 731 an awm bawk a ni.
TB vei leh vei loh ensak 350 an awm a, chhul cancer leh cancer loh ensak hi mi 82 an awm a, khup lama fel lohna nei mi 2 an en bawk a. Thisen test chi hrang hrang 2,684 an awm a. Damlo inentir hnenah hian a thlawn vekin damdawi an sem bawk a ni.
Multi Speciality Clinics-ah hian Mizoram hmun hrang hrang atangin doctor chi hrang hrang an tel a, Super Specialist, Specialist leh staff zawng zawng nen mi 60 vel bawr an ni.
Hmun kilkhawr zawka mipuiten Specialist Doctor an chhawr theih nan Multi Speciality Clinics hi buatsaih a ni a, Mizoram hmun hrang hrangah hetiang hi vawi 14 an buatsaihna a ni.
