School Education Complex, Saitualah naupangte tana tangkai tur thil 30 awmna Thiamna Thul chu vawiinah khan Saitual district chhunga primary school 56 ah sem chhuah a ni.
Semna hun hi R. Lalhmangaihna, Dy. DPC, Saitual District chuan kaihruaiin, Laldingliana, District Education Officer leh District Project Coordinator ni bawk chuan thu a sawi.
Laldingliana chuan Mizoram puma sem chhuah tur Thiamna Thul chu Saitual district-ah pawh sem chhuah a nih avangin lawmawm a tih thu sawiin, zirlai naupangten hlim tak leh tangkai taka an chhawr theih a beisei thu a sawi a ni.
Thiamna Thul-ah hian school zirlai piah lama infiamna leh thiamna hrang hrang an chhawr theih turte a awm thu a sawi a. A dawngtu Primary School aiawh zirtirtu lo kalte chu school office-ah te dah bo mai lo a, naupangten zalen taka an hman theih tura chhawp chhuahsak turin a ngen nghal a ni.
