Aizawl Traffic Police chuan Special Drive an neih chhunzawm zel a, Pathianniah lirthei khalhtu dan bawhchhia eng emaw zat an man.
Khawpui a lo him a, lirthei chetsualna leh dan bawhchhiatna titlem turin Aizawl Traffic Police chuan theihtawp chhuahin hma an la zel a. An hmalakna a hlawhtlin theih nan lirthei khalhtuten chhun leh zan lamah pawh traffic dan leh hraite ngaipawimawh turin an ngen a ni.
Pathianni chawhnuah khan Aizawl khawpui chhung hmun hrang hrangah dan bawhchhia an awm leh awm loh thlithlaiin 'Special Drive' an nei a, helmet khum loa lirthei khalh, licence nei lo leh kum tiling loa lirthei khalh te bakah dan hrang hrang bawhchhia eng emaw zat an man a ni.
Duty awm remchan lohna hmuna dan bawhchhia, midang tana harsatna thlen thinte chu Traffic Control Room (9366553559 leh 0389-2313061) ah hriattir theih reng a nih thu Aizawl Traffic Police hotute chuan an sawi a. Aizawl khawpui himna turin zan lamah a tul anga Special Drive kalpui zel a ni dawn bawk a ni.
