India ram pum huapa hman thin ‘Faina Ni (Swachh Bharat Diwas) 2026’ chu vawiin khan Mizoramah pawh urhsun taka hman a ni a. MINECO-a UD&PA Auditorium-a inkhawm buatsaihah Minister Prof. Lalnilawma chu khuallian niin, AMC Mayor H. Lalremtluanga chu khualzahawm a ni.
He hunah hian faina kawnga thawhhlawk mi pasarih (7) te hnenah chawimawina hlan a nih bakah, faina lama thawk (sanitation worker) mi 95 te hnenah invenna thuamhnaw (PPE kit) sem nghal a ni bawk.
Khuallian Prof. Lalnilawma chuan ram chhung hmun dangte ruala Mizoramin Faina Ni hlawhtling taka a hmang thei chu lawmawm a tih thu sawiin, chawimawina dawngtute a lawmpui thu a sawi a. Minister chuan, “Faina hi rilru puthmang atanga intan a ni a, mahni chauh inngaihtuah lova midangte hmakhua thlira mahni inhlanna a ni zawk,” tiin faina chu mahni theuh atanga tan a tul thu a chham chhuak. Mizo mipuiten entawn tur mi ropui tak tak kan nei chu ropui a tih thu sawiin, kalkhawmte chu faina a taka nunpuitu leh midangte entawntlak nih tum theuh turin a chah nghal bawk.
He inkhawm hi V. Lalsangliana, Commissioner & Secretary, UD&PA chuan a kaihruai a, department hotute hnen atangin thingtlang leh khawpui lama faina kawnga hmalaknate report ngaihthlak a ni. Khualzahawm AMC Mayor H. Lalremtluanga pawhin faina kawnga AMC leh Department hrang hrangte thawhhona tha zawk neih chhoh zel dan tur leh hmachhawpte a sawi fiah bawk. Zodingpuii, Secretary, PHE Department-in lawmthu sawiin hun a khar a ni.
Swachhata Hi Seva (Faina Hapta) hi kum 2017 atanga India ram puma kalpui tan a ni a, kum tin September 17 atanga October 2 inkar chhung hian faina beihpui thlak thin a ni.
