Health Minister Lalrinpuii chuan Mizoram Universal Health Scheme (MUHCS) zawmtu zingah Synod Hospital, Durtlang chu an grade a sang ber a, hospital dangte nen an rate a inang thei lo a ti a. Synod Hospital duhsak taka rate sang fal taka siamsak bik anga sawi awm chu thu dik lo a nih thu a sawi.
Lalrinpuii, Health Minister chuan MUHCS zawmtu damdawi in chu grade hrang hrang pek an ni tih sawiin, grading an siam atangin Synod Hospital hi Silver Grade pek an ni a ti a. Hei hi an damdawi ina an khawl neih dan te, khum an neih zat te, speciliaty an neih dan te, doctor an neih dan leh damdawi in quality atanga teh a nih thu a sawi a, hengte avang hian mimal enkawl damdawi in dang Bronze Grade an pek leh Silver Grade ni mek Synod Hospital rate a inang thei lo tih a sawi bawk.
Synod Hospital-in MUHCS an zawm dawn khan rate chungchangah an indawr nasa tih sawiin Health Minister chuan sawrkar lamin an rate neih sa te pawh an tih hniamtir a, package rate thenkhat erawh han sang deuh te a awm tih sawiin, MUHCS an zawm dawn khan an nawr nasat avangin damdawi in lam hian package rate pawh an siam hman lo a, an rate neih sa ang chu pawm sak mai turin an ngen a, mahse an duh ang diak diakin pawm a ni lo a, a then chu an rate aia hniam zawka kalpui te, thenkhat a sang hlek te pawh a awm a ti.
Synod Hospital nena thawhhona thuthlung Memorandum of Agreement (MoA) an ziah chu October thla thleng a ni tih a sawi a, tunah hian an rate kalpui dan chu thlir letna an nei a, MoA ziak leh turin an inruahman leh mek a, tuna an thuthlung thar turah chuan sawrkarin base rate an neih anga chhut a nih tawh thute a sawi a. Tun hnaia Synod Hospital te duhsak uchuak a, rate sang taka inremsiam pui anga thu thang awm chu thu dik lo a nih thu sawiin, kohhran enkawl damdawi in dangte nen Synod Hospital chu khaikhin theih an ni lo a, an grade a insan hleih tih te sawiin, Synod Hospital rate hi a sang fal bik lo niin a sawi.
Synod Hospital hi khum 350 nei, NABL Certificate nei a nih avangin tuna MUHCS an zawmna rate hi an phu viau niin Health Minister chuan a sawi a. Synod hotuten mipui harsatna sut kian nana tlawmngaia MUHCS an zawm hi a lawm awm em em a, damlo mi harsate tana sum pe lawk loa damdawi ina inenkawl na an kalpuite hi mipui rawngbawlna rilru vang a nih thu te sawiin, an grade pui damdawi in dangte nen khaikhinin rate pawh hi a sang fal bik lo niin a sawi bawk.
