Thingdawl ram chhunga Hmawngkai lui leh Tuikhuahmawng luia tur chi khat Glycel hmanga chakai hraitu mi pathumte chu hrem an ni.
October ni 6, 2026 ah khan tur hmanga chakai hrai an nih thu hriain District Fisheries Development Officer (DFDO), Kolasib leh Thingdawl VC-I ten an chhui zui hnuah mi pali an ko a. An mi koh te hi Ngaithanmangi Thingdawl Kawnveng; Vanlalkimi, Sesawng Vengthar Tlangveng; Ruthi Lalawmpuii, Sesawng Vengthar Tlangveng leh Lawmzuala, Sesawng Vengthar Tlangveng te niin, DFDO Office, Kolasib-ah koh an ni.
An zinga mi pathum chu an kal a, dan an bawhchhiat dan hrilh hriat an nih hnuah intiamkamna neihtir an ni a. The Mizoram Fisheries Amendment Act, 2022 Section 10, 'Compounding of Offences' hmangin Rs. 2,000/- theuh chawitir an ni. Lawmzuala, Sesawng Vengthar Tlangveng chu a tlanbo avangin Kolasib Police Station-ah thlen a ni a, tunah hian zawn mek a ni.
DFDO, Kolasib District chuan lui dunga nungchate humhalh leh an lo pun zel theih nan phalna tel lo chuan lui dung nungcha man, tihbuai leh thah chu danin a khap tlat thu a sawi a, dan bawhchhiate chu hrem zel an nih tur thu a sawi.
