Tlangnuam Vengthar Branch YMA Education Sub-Committee hmalaknain an veng chhung mi, kum 2027 HSLC Exam hmachhawn turte tan a thlawna tuition kal theihna buatsaih a ni a, a hawnna hun leh inrawnkhawmna hun buatsaih a ni.
October ni 1, 2026 zan dar 7:30 ah khan he hun hi Khuangchera Runah hman a ni a. He hun hi H. Lalhruaitluanga, Asst. Secretary, OB i/c Education in a kaihruai a; Samuel J. Laltlanzaua, Member, Education Sub-Committee in hunserh a hman zawh hnuah Lalrinsiami, Secretary, Education Sub-Committee in kumin chhunga hmalakna leh hmachhawp mai bakah inhmelhriattirna hun a hmang a ni.
Kumin chhung hian Education Sub-Committee in kawng hrang hrangin hma an la tawh a ni, zirlaibu hlui khawn leh sem chhuah, HSLC leh HSSLC pass tharte lawmpuina hlan, Career Awareness, Legal Awareness, Consumer Awareness, veng chhunga school tlawh leh Free Tuition te chu an hmalakna langsar zual a ni. Hei mai bakah hoarding tar chu an hmachhawp neih leh kalpui an tum mek a nih thu an sawi.
Lalnunmawia, President, Branch YMA in thu sawiin, Education Sub-Committee in thil theih loh tura ngaih thil tam tak an kalpui tawh thu te, tuna Free Tuition kalpui an tum hi thil huphurhawm tak a nih rualin thil phurawm tak a nih thu a sawi a. Branch chuan hma a sawn thu leh Branch tam takte awh rawn veng an nih thu a sawi a. Zirlaite vannei a tih thu sawiin, tih tak zeta zir tur leh mi inpe te chungah lawmthu a sawi hnuin Free Tuition hawnna hun a hmang chhunzawm nghal a ni.
Hawnna hun hman zawh a nih hnuah Rodingliana, Chairman, Education Sub-Committee chuan Free Tuition kalpui tum a nih dan leh a kalphung turte, subject har deuha ngaih mathematics leh science subject-ah bik kalpui tur a nih thu leh kar tin Ningani leh Zirtawpni zanah kalpui tur a nih thu a sawi.
Sub-Committee thurel dan te leh duh dante sawiin quantity aia quality ngaih pawimawh a nih thu leh qualified zirtirtu ten zirtirna an pek tur thute ngaihthlak a ni a. Chumi zawhah inrawnkhawmna hun hman niin kalkhawmte atangin an beisei dan leh duh dan te leh ngaih pawimawhte Sub-Committee Chairman kaihhruaina hnuaiah sawihona hun hman a ni bawk.
Free Tuition hi October 2026 atanga December 2026 thleng kalpui tum a ni a, a tul dan a zirin a bak pawh zirlaite tan hma lak dan tur dap a ni dawn bawk a ni.
He hunah hian zirlaite leh an chhungte an kal tha hle.
