Young Mizo Association (YMA) chuan vawiinah khan LPS Arena, Falkland Vengah Rorel Inkhawm Vawi 5-na an nei.
Mizorama tlawmngai pawl lian ber YMA chuan Mizorama raltlante awm dan leh ram dang mi, dan loa rawn sumdawngte khuahkhirhna mumal zawk a awm theih nan sawrkarin ruahmanna a siam theih nan hma lak an rel.
Rorel inkhawmah hian Bairabi atanga Sairang inkar rel station leh sub-station ah te uluk zawkin Inner Line Permit (ILP) check a nih theih nan Central YMA in hma lak an rel a. Mizoram leilung fate an him nan Trading Regulation fel fai tak nei turin sawrkar chu chak zawka hma la tura nawr an rel bawk.
YMA khawih lampangah Mizoram pawn atanga company, Mizoram chhunga hna rawn thawktuten hnathawktu atan ram leilung fa tam zawk an chhawr theih nan Central YMA in hma la chhunzawm zel se an ti a. Central YMA in aia upa zah inzirtirna kawngah tun aia chak zawkin hma la rawh se an tih bakah, environment humhalh chungchangah chak zawkin hma lak ni rawh se an ti.
Tlawmngai pawl lian YMA ah hian tun dinhmunah member 5,23,808 an awm mek a, heng zinga 3,02,136 chu mipa niin, 2,21,672 chu hmeichhia an ni. YMA Branch 831 awmin, Group YMA 49 a awm a, YMA Sub-Headquarters 9 a awm bawk a ni.
