Kawnpui leh Mualkhang inkarah tui leh chirhdiak a luan luh avangin Bairabi leh Sairang inkar rel tlan tihtawp lailawk a ni a, zanin atangin rel hi a pangngaiin a tlan leh thei tawh dawn.
Nilaini chawhnu lama ruah sur nasa tak avangin rel kawngah hian harsatna a thleng a, zin veivakte himna ngaihpawimawh a nih avangin rel tlan hi chawlhtir lailawk a ni a. Kolkata atanga Sairang pan leh Silchar atanga Sairang pan (Express train) hmanga zin, Bairabi-a tangkhangte chu Sairang leh Aizawl an thlen theih nan Bairabi-ah hian bus 20 ruahmansak an ni.
Bairabi leh Sairang inkar rel kawng hi thuneituten uluk takin an endik nghal a, rel kawng leh a kaihhnawih bungraw dangah chhiatna thleng a awm lo tih finfiah a ni a. Chutih rualin rel kawng hmun hnihah chirh leh diak khal a tling a, hengte hi thenfai nghal a ni a. Rel kawnga chirh tlingte thian fai tur hian JCB bakah hnathawktu mi 50 chuang zet chhawr an ni a, theih tawp chhuaha an then fai tak avangin zanin dar 7:00 atangin Sairang-Guwahati rel chu a pangngaiin a tlan leh thei tawh dawn a ni.
