Aizawl District Congress Committee chuan vawiinah khan 2026-2028 chhunga Aizawl City Block Congress Committee hruaitu tharte lawmpuina hun Lal Thanhawla Auditorium ah hmangin Lal Thanzara, MPCC President chuan a hmanpui.
Lal Thanzara chuan politics-ah hian Pathian a inrawlh a. Chutih rualin politics a nih avanga mipuite bum a, dawt sawi ching an awm thin a, politics a nih avanga dawt sawi thinte hian an bansan a tul hle a ni tih sawiin, Congress party hian mipuite hi dawt an hrilh ve ngai lo a ti.
Inthlan dawn apiangin party te chuan mipuiah thil tiam an nei thin a, Congress party ten chutianga kan intiamna chu Pathian khawngaihna azarah kan la tihlawhtling thei zel a, Congress hotute hi an thusawiah an ding thin a ni a ti bawk.
MPCC President chuan, “Rangva sem atangin NLUP sem thlengin mipuia kan hotute intiamna hi a la hlawhtling zel a. Mizoramin remna leh muanna a neih theihna turin Congress party chu a intiamna ang ngeiin mahni lalthutthleng nam thluin remna leh muanna kan lo nei ta a. Khatih lai khan remna leh muanna aia hlu Mizo mipuite tan a awm lo a ni,” a ti.
BJP chungchang sawiin Lal Thanzara chuan, “Tun hnaiah BJP hotupa Amit Shah lo kal tur chu eng emaw rokhawlhna avangin a rawn thulh leh a. A rawn kalna tur chhan hi BJP a ZPM te baptist a tum vang nia hriat a ni a. A rawn kal hunah Mizoram BJP MLA pakhat hi chu Deputy CM atan ZPM ten an lak luh ngei a rinawm a ni,” a ti a ni.
Lal Thanzara chuan Kristian nuai chimih tumtu BJP te hian India independent kum 100-na thlenga rorelna hi an chelh a nih chuan sakhaw tlem zawkte tana thil hlauhawm tak a nih thu sawiin, BJP sawrkar hian pawisak a nei lo hle a sawi.
A sawi zelnaah India rama inthlana an hotupa ber chuan vote tam tak a lo paih a, India ram thalaiten he thil hi lungawi lohna lantirin tunah hian an pung khawm mek a ni a ti a. Election Commission Chairman hi a ban hma chu nawr zel an tum tih sawiin, inthlanna fel leh thianghlim a awm ngei theihna turin Congress party leh a thawhpui India Block te chuan theihtawpa hma lak chhunzawm an tum a ni tih a sawi bawk.
Congress President Lal Thanzara chuan India ramah Congress nasa takin a thang chho mek tih a sawi a. 2029 a Lok Sabha inthlanpui lo awm turah Congress chu sang taka hnehna chang thei tur leh Rahul Gandhi ngei pawh PM ni turin India ram mipuite hian beiseina an nei sang hle tawh tih sawiin, Mizoramah pawh Congress party chuan nasa takin hma an sawn a, rorelna tha leh dik a awm theihna turin Zoram mipuiten Congress party chu sawrkartir an tum mek a ni tih a sawi.
