Mizo Hnam Runa chhung inkhawm an neihah Mizo National Front (MNF) General Secretary Er. Lalrinawma, Ex-Minister chuan thu sawiin, ZPM sawrkar chuan sum an enkawl thiam loh vangin an ti lapse teuh tih thu a sawi.
Er. Lalrinawma chuan, “ZPM sawrkar hian mipui hnenah chhiah an la tawk tawk a, sawrkar hnathawkte sum health care-a an chhuh luih mek lai hian sum enkawl an thiam loh avangin sum an ti lapse teuh teuh a. SASCI Scheme atang ringawt pawhin 23,331 lakhs (2023-2024), 11,152 lakhs (2025-2026), a vaiin nuai 34,482 an ti lapse a ni. A pawi hle," a ti.
MNF General Secretary chuan, “Chief Minister meuh pawhin sum a lapse thu hi a sawi a, mipuia sum an tuk tawk tawk laia an tih fel ve tur pawh tifel thei lo a, sum a luang ral thin hi a pawi hle. Hetiang a nih chuan mipuite hi chhiah pe zel turin min beisei ngam dawn em ni? A vanduaithlak tak zet a ni," tiin a sawi.
"Sum enkawl thuah ZPM sawrkar hi an inen chian a ngai hle. MNF sawrkar kha chuan sum harsatna a tawhin mipuiin an tawrh theihna tur chhiah tihpun leh thil danga hma lak kha a duh lo a. Central lamah kan CM zahawm tak ni thin Pu Zoramthanga kha kalin sum sawi chhuah dan a zawng a, Peace Bonus te sawi chhuakin, BAFFACOS leh thil dang tam tak a sawi chhuak a ni. ZPM sawrkar kan hrawn mek erawh hi chuan mipuiah chhiah an khawn a, oil-ah chhiah an la a, buhfai man a letin an tipung a, sawrkar hnathawkte tuk luiin Health Care an kalpui bawk a ni. MNF sawrkar khan sawrkar hnathawkte tuk luih a duh ve loh avangin kan sawipui hnuah an zahawmna zahsakin sum kan chhuh ta lo a ni," a ti bawk.
A sawi zelnaah, "Tuna kan sawrkar kal dan hi chhut chian a ngai khawp mai. Article 371G kan neihte hi a hlut tehreng nen a sawi nep leh a sawi sawp zawngin an kal a, hnam tan a him lo. FCAA te lah ni se an opposition laia 'dan sakei' an tih kha an pawmpui ta a. ILP te lah 'an duh chuan an hlip thei' tihte kan CM sawi duh a ni. A pawi hle a ni. Kan CM leh he sawrkar hian dan loin bei se, nawr se kan ti reng reng lo. India danpui hnuaia kan dikna neih sa hi hnam tan dinpui rawh se kan ti mai a ni," a ti.
Hnam a ral chuan mimalin tumah kan him dawn lo tih sawiin Er. Lalrinawma chuan, "Mizo hnamin thil hlu kan neihte vawnghim turin theih tawp kan chhuah a ngai a. Chumi atana MNF-in Pathian leh kan ram tan kan ti tlat hi a pawimawhin a hlu hle a. Pathian leh kan ram tan titu MNF a din chhuah leh hi a tul tak zet a ni," tiin a sawi.
